Tre në pranga, dhunuan policët gjatë ndeshjes së basketbollit
Tre persona u arrestuan dhe tre të tjerë po hetohen në gjendje të lirë pasi kundërshtuan me dhunë punonjësit e Policisë, duke përdorur sende të forta gjatë ndeshjes së basketbollit midis ekipeve Tirana– Partizani. Specialistët për Hetimin e Krimit në Komisariatin nr. 3 bënë arrestimin në flagrancë të shtetasve, Bledar Beca, 33 vjeç, Agron Meçanaj, 38 vjeç dhe Aden Xh., 18 vjeç, banues në Tiranë. Arrestimi i këtyre shtetasve u bë pasi, të shtunën, rreth orës 17: 30, në rruga “Dritan Hoxha”, para fillimit të ndeshjes së basketbollit, e cila do zhvillohej në pallatin e sportit “Asllan Rusi”, bashkë me disa persona të tjerë ende të paidentifikuar, kanë kundërshtuar me dhunë punonjësit e Policisë. Ngjarja ka ndodhur jashtë ambienteve të Pallatit të Sportit, ku ata kanë dhunuar punonjësit e Policisë të Forcës së Posaçme “Shqiponjat” dhe shërbimet e tjera të Komisariateve të Policisë nr. 2 dhe nr. 3, duke i goditur me sende të forta, gurë, drunë e shkopinj bejsbolli. Ndërhyrja e menjëhershme e forcave të tjera të Policisë, bëri të mundur neutralizimin e veprimeve të mëtejshme nga ana e tifozëve kundrejt Policisë, si dhe më pas arrestimin e tre prej tyre, të cilët qëlluan punonjësit e Policisë me sende të forta. Sipas Policisë, motivi i kësaj situate ka qenë se punonjësit e Policisë kishin marrë detyrë që atë grup tifozësh, prej afro 130 personash, ta zhvendosnin nga aty ku ishin pozicionuar, pasi ishin burim konflikti dhe ishin përgatitur të prodhonin konflikt me ekipin kundërshtar, atë të Tiranës. Gjithashtu u referuan materialet në Prokurori për shtetasin H. K., I. S. dhe Th. N., banues në Tiranë, pasi në pallatin e sportit “Asllan Rusi”, gjatë zhvillimit të ndeshjes së basketbollit Tirana- Partizani, kanë prishur rendin dhe qetësinë publike.