Emrat e 7 kandidatëve për Kryeprokuror, Lu: Qeveria dhe opozita ta zgjedhin bashkë
PRESIDENTI META: ZGJEDHJA E PROKURORIT, SIPAS ‘ VENECIAS’
Ambasadori i Shteteve të Bashkuara në Tiranë, Donald Lu, i ka bërë thirrje maxhorancës dhe opozitës të bashkëpunojnë për të zgjedhur një Prokuror të Përgjithshëm të Përkohshëm. Gjatë fjalës së tij në Konferencën Vjetore të Avokatit të Popullit, Lu kërkoi nga politika që t’i japë fund epokës kur Prokurori i Përgjithshëm mbron politikanët e korruptuar. Me tone të ashpra, ambasadori Lu foli për politikanë të frikësuar, që thonë se Reforma në Drejtësi ka vdekur. Lu ka kujtuar se Reforma në Drejtësi jo vetëm që nuk ka vdekur, por ka hyrë në një çast vendimtar. Ambasadori amerikan ka kujtuar se ai vetë do të luftojë për Reformën në Drejtësi pasi ajo është edhe një përparësi e lartë e Presidentit amerikan dhe e Sekretarit të Shtetit. Për të gjitha këto arsye, diplomati amerikan i bëri thirrje maxhorancës dhe opozitës, t’i lënë mënjanë mosmarrëveshjet e parëndësishme mes tyre dhe të zbatojnë Reformën në Drejtësi.
Shumë vite më parë, kur bashkëshortja ime bënte kërkime akademike mbi dhunën në familje, jepte mësime joge në një strehëz në Azinë Qendrore për gratë që kishin qenë viktima të trafikimit ose të dhunës me bazë gjinore. Shpeshherë, ajo kthehej në shtëpi me histori të pabesueshme për ato që gratë dhe vajzat kishin pësuar nga duart e trafikantëve të seksit dhe bandave kriminale. Kur sapo mbërritëm në Shqipëri, vizituam të tri strehëzat e OJQ- ve dhe strehëzën shtetërore për viktimat e dhunës në familje dhe trafikimit. Atje takuam vajza të reja të guximshme, disa vetëm 14 vjeçe, që ishin trafikuar dhe kthyer në Shqipëri. Pjesa më e madhe ishin refuzuar nga familjet e tyre dhe kishin përfunduar në këto strehëza. Atje dëgjuam historinë e një viktime të dhunës në familje, së cilës një gjykatës i korruptuar ia kishte hequr fëmijët. Bashkëshorti i saj abuziv kishte qenë i dënuar për krime seksuale. Kur ajo më në fund pati guximin ta divorconte, në vend që të gjente drejtësi, gjykatat ia morën fëmijët e saj. Kujdestaria për dy nga tre fëmijët e tyre iu dha burrit, i cili e rrihte sepse ai kishte korruptuar gjykatësin. Kjo e shkatërroi atë. Të gjithë ne luftojmë për arsye vetjake. Unë luftoj për Reformën në Drejtësi për këtë grua, për fëmijët e saj dhe për të gjitha familjet e tjera që kanë vuajtur nga një sistem gjyqësor i korruptuar. Luftoj për Reformën në Drejtësi edhe sepse është një përparësi e lartë e Presidentit amerikan dhe e Sekretarit të Shtetit. Reforma në Drejtësi po hyn në një çast vendimtar. Komisionet e vetingut dhe vëzhguesit ndërkombëtarë kanë punuar shumë. Së shpejti, ata do të përfundojnë çështjet e para të vetingut. Kjo do të sjellë krijimin e organeve të tjera të Reformës në Drejtësi, përfshirë SPAK- un dhe BKHnë. Shqiptarët presin me padurim për drejtësi. Dhe politikanët kanë frikë. Disa politikanë kanë thënë së fundmi se Reforma në Drejtësi ka vdekur. Ajo nuk ka vdekur, por mundësia që politikanët e fuqishëm të kontrollojnë dhe manipulojnë sistemin e drejtësisë, është pothuajse e vdekur. Sistemi i vjetër i drejtësisë mbronte njerëzit me pushtet dhe pasuri përmes korrupsionit dhe ndikimit politik. Sistemi i ri nuk mund të ketë një Prokuror të Përgjithshëm, që nuk ndjek askënd penalisht. Ky vend nuk mund të hyjë në Bashkimin Europian nëse vazhdon të ketë shkallën më të ulët të ndjekjes penale të krimeve të rënda në Europë. I kemi bërë thirrje qeverisë dhe opozitës, të punojnë së bashku për të gjetur një zëvendësues të përkohshëm të Prokurorit të Përgjithshëm, të cilit i përfundoi mandati pesëvjeçar më 7 dhjetor. Të dyja palët duhet t’i japin fund epokës kur Prokurori i Përgjithshëm mbron politikanët e korruptuar. Në emër të grave dhe të fëmijëve që vuajnë si pasojë e një sistemi gjyqësor të korruptuar, shpresoj që politikanët do t’i lënë mënjanë mosmarrëveshjet e tyre të parëndësishme dhe do ta zbatojnë këtë Reformë në Drejtësi.