Shqipëria në krah të vendeve islamike, votë kundër Trump
Mbështet thirrjen e vendeve islamike që SHBA të anulojë vendimin për Jeruzalemin
Shqipëria pozicionohet kundër vendimit të Shteteve të Bashkuara të Amerikës për të njohur Jerusalemin kryeqytet të Izraelit.
Gent Gazheli, ambasadori ynë në Turqi, ka përfaqësuar Shqipërinë në Samitin e jashtëzakonshëm të vendeve të Organizatës për Bashkëpunim Islamik, të thirrur dje nga Turqia, si vendi që mban presidencën e radhës të organizatës. Duket se Shqipëria e ka pranuar deklaratën përfundimtare të këtij Samiti, për sa kohë në njoftimin e Organizatës për Bashkëpunim Islamik për këtë samit thuhet se "Samiti i Jashtëzakonshëm Islamik, më 13 dhjetor 2017, në Stamboll, u bëri thirrje Shteteve të Bashkuara të Amerikës që të revokojnë vendimin e saj për të njohur Al- Quds ( Jerusalemin) si kryeqytetin e Izraelit, duke refuzuar vendimin e Presidentit të SHBA- ve për të zhvendosur Ambasadën Amerikane në këtë qytet.
Të 57 anëtarët e organizatës, mes të cilëve edhe Shqipëria, përmes një deklarate të përbashkët thanë se mbeten të angazhuar për një zgjidhje të drejtë dhe gjithëpërfshirëse, me formim- in e dy shteteve, dhe u kërkuan vendeve të tjera që të njohin shtetin e Palestinës dhe Jerusalemin Lindor si kryeqytetin e tij të pushtuar. "I ftoj të gjitha kombet që e vlerësojnë ligjin ndërkombëtar dhe drejtësinë, ta njohin Jerusalemin si kryeqyte- tin e pushtuar të shtetit palestinez. Ata që luftojnë me miqtë e tyre harrojnë të luftojnë armiqtë. Neve na lipset një zgjidhje diplomatike. Duhet t'ia ndalojnë Izraelit gllabërimin e tokës palestineze nga dita në ditë. Dhe nuk duhet t'i pranojmë politikat e sjelljen që ai na afishon përditë", tha Erdogan gjatë fjalës së tij. Në komunikatën përfundimtare, Samiti e cilëson administratën e SHBA- ve plotësisht përgjegjëse për çdo pasojë, duke refuzuar të hedhë poshtë këtë vendim të paligjshëm. "Në këtë mënyrë, administrata amerikane po dezerton qartë rolin e saj si ndërmjetësi i paqes", thuhet në deklaratën përfundimtare. "Organizata i bëri thirrje botës arabe myslimane të bashkohet me përpjekjet, rajonale dhe mbarëbotën, për të shfrytëzuar të gjitha mjetet diplomatike në dispozicion për të kundërshtuar masa të tilla dhe të përballet me vendimin e njëanshëm të SHBAve, të refuzuar nga shumica e vendeve botërore", thuhet në deklaratë.