Kryemadhi: Marrja në pyetje e prokurorëve në Kuvend e paligjshme, detyrë e KLP- së

Kryetarja e LSI- së, Monika Kryemadhi ka akuzuar Kryeministrin se, përmes shoqërisë civile të kontrolluar prej tij, ka bllokuar ngritjen e Këshillit të Lartë të Prokurorisë, organin që ka të drejtë të zgjedhë Prokurorin e Përgjithshëm. Në një bashkëbisedim me gazetarët, Kryemadhi kërkoi që forcat politike të ndryshojnë nenin ku i jepet një anëtar Shoqërisë Civile për aq kohë sa po bllokohet ngritja e KLP- së dhe po zgjidhet një kryeprokuror politik. “Të ndryshojmë nenin për shoqërinë civile, meqenëse shoqëria civile për disa vite nuk është e gatshme të japë një kandidat për Këshillin e Lartë të Prokurorisë, hajde ta ndryshojmë, për aq kohë sa ata ta mendojnë: për 5 vjet, për 10 vjet, apo 2 vjet, të jetë shoqëria civile për të qenë pjesë e Reformës. Por ne nuk mund të presim shoqërinë civile derisa të jetë e gatshme për të na dhënë një kandidat për të ngritur Këshillin e Lartë të Prokurorisë. Kjo është edhe një nga arsyet që mbahet peng”, tha Kryemadhi. Kryetarja e LSI- së e cilësoi të paligjshme mbledhjen e Komisionit të Ligjeve dhe marrjen në pyetje të kandidatëve për Prokuror të Përgjithshëm të përkohshëm duke kujtuar se organi që ka të drejtë të marrë në pyetje kandidatët është vetëm Këshilli i Lartë i Prokurorisë. “Komisioni i ligjeve që bën seancën dëgjimore është totalisht i paligjshëm, nuk e dimë me çfarë targeti e bën takimin. Komisioni i Ligjeve nuk është Këshilli i Lartë i Prokurorisë. Dëgjesat me kandidatët për Prokuror të Përgjithshëm i bën Këshilli i Lartë i Prokurorisë. Në zgjedhjen e prokurorit, dëgjesat me kandidatët për prokuror janë të shkruara në Kushtetutë, e cila është e votuar me 140 vota si asnjëherë tjetër”, sqaroi kryetarja e LSI- së.