Qeveria miraton shpërblimin për festat, 6 kategoritë e pensionistëve që përfitojnë

Zbardhet Paketa e Solidaritetit, 3 mijë lekë për moshën e tr etë, 2 mijë lekë për ndihmën ekonomike e personat me aftësi të kufizuara

Qeveria vendosi dje të ndajë 3 mijë lekë për pensionistët dhe 2 mijë lekë për ata që marrin ndihmë ekonomike dhe për personat me aftësi të kufizuara. Gazeta zbardh të plotë vendimin e Paketës së Solidaritetit bashkë me kategoritë që do të përfitojnë shpërblimin. Në vendim saktësohet se shpërblimet do të ndahen brenda dhjetorit.

“Shpërblimet të kalohen në llogaritë e pensionistëve në muajin dhjetor 2017 dhe të paguhen gjatë këtij muaji. Në rastet kur pagesat efektive nuk kryhen brenda muajit dhjetor 2017, ato të paguhen gjatë vitit të ardhshëm”.

KUSH PËRFITON Masa e shpërblimit është e barabartë për pensionistët, prej 3 mijë lekësh. Atë do ta përfitojnë rreth 649 mijë pensionistë, nga të cilët mbi 506 mijë janë pensionistë në pension pleqërie, 70 mijë persona në pension invaliditeti, 55 mijë persona në pension familjar, dhe mbi 18 mijë persona të tjerë në trajtim financiar me pension social, pension apo trajtim të veçantë financiar si minatorë të nëntokës, punonjës të ish- ndërmarrjeve ushtarake dhe ushtarakë në pension të parakohshëm. Sipas relacionit, qëllim i vendimit është “përmirësimi i vazhdueshëm i nivelit të plotësimit të nevojave të pensionistëve, nëpërmjet një kontributi financiar për mbulimin e një pjese të shpenzimeve personale për festat e fundvitit”. Në vendim parashikohet që brenda javës të lidhet marrëveshja me postën dhe të vendosen datat e fillimit të ndarjes së shpërblimit. Pensionistët nuk do të paraqesin asnjë dokument shtesë për të marrë paratë e Paketës së Solidaritetit.

Pjesë e skemës së shpërblimeve do të jenë edhe personat me aftësi të kufizuara dhe me ndihmë ekonomike. “Kemi vendosur të shpërblehen me rastin e festave të fundvitit në masën 20 mijë lekë të vjetër edhe personat që trajtohen me ndihmë ekonomike, si dhe kategorinë e personave me aftësi të kufizuara”, theksoi ministrja Manastirliu gjatë prezantimit të vendimit të qeverisë. Ministrja tha se fondi total që qeveria ka vendosur të vë në dispozicion për shpërblimin e fundvitit ka vlerën 2 miliardë e 253 milionë lekëve të rinj. “Kjo Paketë Solidariteti konfirmon edhe një herë vëmendjen dhe përkujdesin e qeverisë për ata që kanë nevojë për përkujdesje dhe mbështetje në këtë prag festash”, u shpreh ministrja e Shëndetësisë dhe Mbrojtjes Sociale.