Tabaku: Prokurimet publike, turpi i kësaj qeverie!
Deputetja demokrate Jorida Tabaku ka akuzuar qeverinë e majtë se zhvillon formalisht procedurat e tenderimeve, ndërkohë që fituesit janë paracaktuar. "A e dini se nga 33.618 procedura prokurimi, 9.613 procedura, ose 28,5% të procedurave, janë procedura me negocim pa shpallje? Kush mban përgjegjësi për këtë, që 1 në 3 tenderë janë pa garë, e ato që janë me garë, janë me garë totalisht fiktive? Unë sot e pashë se kush ishte përfshirë në këtë proces, e pashë se çdo vendim merrej nga individë që nuk kanë asnjë meritë tjetër, përveç lidhjeve politikë e asnjë ditë pune tjetër në asnjë institucion, përveç atyre në Komisionin e Prokurimit Publik", tha Tabaku. Sipas saj, Komisioni i Prokurimeve Publike është një komision totalisht i varur nga qeveria, ndërsa procedurat që zhvillohen janë formale. "I gjithë procesi që u zhvillua, përveçse është një farsë, tregoi edhe fytyrën e vërtetë të Komisionit të Prokurimeve Publike:
Nga 10 kandidatë që konkurruan, 5 ishin kryetarë/ zëvendëskryetarë dhe anëtarë aktualë të Komisioni të Prokurimit Publik, duke e bërë totalisht të pavlefshme kërkesën për pavarësi të këtij institucioni; Cilësia e kandidatëve linte për të dëshiruar, kur kryetarë/ zëvendëskryetarë dhe anëtarë aktualë të komisionit nuk njihnin ligjin, procedurat, rregulloren, nuk mbanin përgjegjësi për vendimet, nuk i kujtoheshin asgjë nga vendimmarrja e tyre në detyrë", shkruan deputetja Tabaku në një status të saj në Facabook. Duke u nisur nga seanca e dëgjesës në Komisionin e Ekonomisë me kandidatët për komisionerë dhe kryetar të Komisionit të Prokurimit Publik, Tabaku shprehet se: "vendimet e Komisioni të Prokurimit Publik janë të gjitha të njëjta me ato të enteve prokuruese. Siç pohoi një nga kandidatët, në 99 për qind të rasteve nuk ndryshohet vendimi, pavarësisht ankimimit. Vendimet e Komisioni të Prokurimit Publik janë të gjitha të njëjta me ato të enteve prokuruese. Siç pohoi një nga kandidatët, në 99 për qind të rasteve nuk ndryshohet vendimi, pavarësisht ankimimit; Në disa vendime, të cilat u cituan nga opozita, brenda të njëjtit vendim kishte dy qëndrime të ndryshme për të njëjtën çështje".