Ngrohja në shkollë, nxënësit me pankarta me emrin e kryebashkiakut

SARANDE - Vendosja në punë e kaldajës në shkollën 9- vjeçare "Mehmet Xhaferi" në Xarrë të Sarandës është kthyer në një eveniment. Me pankarta në duar, ku shkruhej "Faleminderit zoti Shuaip", nxënësit kanë pozuar para hyrjes së godinës së shkollës në shenjë falënderimi për kreun e Bashkisë së Konispolit, Shuaip Beqiri. Kjo fotografi u postua në faqen e shkollës në Facebook, ku ndër të tjera vendosja në punë e kaldajës cilësohej "vepër madhështore" e Beqirit. Po ashtu, në postimin e bërë, kjo shkollë vetëkonsiderohet si një nga më të mirat në qarkun e Vlorës dhe nxënësit e zhvillojnë mësimin pa qenë nevoja që të mbajnë xhupat veshur. Nuk dihet se e cilit ka qenë kjo ide, por disa orë më pas, fotografia është fshirë. “‘ Ditë gëzimi’ ishte sot për nxënësit e shkollës 9- vjeçare Xarrë. Kaldaja filloi punën, ngrohja është e pranishme në çdo klasë. Nxënësit e zhvillojnë mësimin në kushte shumë të përshtatshme, shumë të rehatshëm, pa xhupa. Shkolla jonë është më e mira në qarkun e Vlorës, me të gjitha kushtet për një mësimdhënie dinjitoze. Prindër, nxënës dhe kolektivi i mësuesve i shpreh mirënjohjen dhe falënderojnë kryetarin e Bashkisë Konispol, z. Shuaip Beqiri, për këtë vepër madhështore", shkruhej në postimin e bërë në rrjetin social "Facebook". Shuaip Beqiri, i cili përfaqëson Partinë Socialiste, ka drejtuar Bashkinë e Konispolit për tri mandate në periudhën 1996 - 2006, ndërsa në zgjedhjet lokale të vitit 2015 fitoi mandatin e katërt. Kurse në zgjedhjet parlamentare të vitit 2013 ishte kandidat për deputet për Partinë Socialiste në qarkun e Vlorës, por nuk u shpall fitues.