Vota kundër SHBA për Jerusalemin, Bushati: Jemi në linjën e BE
“Në Konferencën Islamike përfaqësohemi me nivel jopolitik”
Çështja e Jerusalemit dhe rezoluta e Organizatës së Bashkëpunimit Islamik u bë pjesë e diskutimeve në Kuvendin e Shqipërisë.
Deputeti demokrat Tritan Shehu, i vetmi që e ngriti këtë çështje në seancën e djeshme parlamentare, i kërkoi ministrit të Jashtëm Bushati shpjegime për pozicionin e Shqipërisë në samitin e jashtëzakonshëm të Konferencës së Bashkëpunimit Islamik, të mbajtur në Turqi. Sipas tij, qëndrimi i mbajtur nga ambasadori në Konferencën e OBI- t, të pakonsultuar as në Komisionin e Jashtëm dhe as me opozitën, e ka pozicionuar Shqipërinë kundër SHBAsë. “Këto ditë, me keqardhje, kam parë që në një aktivitet të rëndësishëm dhe në një pozicion shumë të rëndësishëm të Shqipërisë, që është ndërmarrë në Konferencën Islamike, nuk është konsultuar Komisioni i Jashtëm dhe opozita shqiptare dhe, për gjykimin tim, janë bërë hapa të gabuara mjaft negative për vendin tonë dhe marrëdhëniet tona me SHBA- në”, tha deputeti demokrat. Sipas tij, qëndrimi i ambasadorit shqiptar në këtë samit ka qenë antiamerikan. “Ambasadori ynë atje, në mbledhjen e Ministrave të Jashtëm, mban një fjalim ku kthehet përsëri te ’ 67- a, kërkon kufijtë e ’ 67- ës, vendos kushte që nuk i ka vendosur as BE. Merr pjesë dhe miraton një rezolutë thellësisht antiamerikane, ku SHBA të mos jetë më intelekutor në zgjidhjen e çështjes së Lindjes së Mesme, një rezolutë, e cila është shumë larg çdo rekomandimi dhe vetë politikës së BEsë, duke kaluar në ekstrem në qëndrimin antiamerikan. Pyes zotin ministër, si është e mundur një gjë e tillë, si ka mundësi një gjë e tillë? Pse nuk u ule në Komisionin e Jashtëm për një çështje kaq të rëndësishme, çfarë fshihet pas kësaj?”, tha Shehu. Në replikë me të, ministri i Jashtë, Ditmir Bushati tha se në përputhje me Konventën e Vjenës, Presidenti, Kryeministri, ministri i Jashtëm dhe ambasadori kanë plotfuqishmëri. “Kjo është edhe arsyeja përse ai quhet i plotfuqishëm. Nuk do të vijë asnjëherë në Komision ambasadori për të marrë mendim për këtë çështje”.
Sipas ministrit Bushati nuk ka një qëndrim të ri nga ana e Shqipërisë. “E kemi bërë këtë diskutim edhe për Palestinën në OKB me shumë prej jush. Është i njëjti qëndrim që Shqipëria ka mbajtur në OKB, në lidhje me 4 rezoluta të Këshillit të Sigurimit, rezoluta detyruese që i referohen 1967- s, në përputhje me linjëzimin tonë të politikës së jashtme 100% me atë të Bashkimit Europian” sqaroi ai. Ministri Bushati i kujtoi opozitës se në Organizatën e Bashkëpunimit Islamik Shqipërinë e ka anëtarësuar Sali Berisha në 1992- in. “Së pari, anëtarësia jonë në Konferencën Islamike, që tani është Organizatë e Bashkëpunimit Islamik, daton në vitin 1992. Unë kam qenë gjimnazist dhe ju keni qenë në qeveri. Historia është shumë interesante. Nëse dëshironi, mund të bëjmë edhe një seancë për këtë çështje. Shqipërinë në këtë konferencë e ka anëtarësuar zoti Berisha. Niveli ynë i përfaqësimit, tradicionalisht, ka qenë jo politik. Fte- sat kanë qenë për Presidentin dhe ministrin e Jashtëm, por niveli ynë i përfaqësimit dihet”, tha Bushati. Ai tha se në këtë samit nuk është votuar, por Shqipëria ka marrë pjesë si anëtare e saj. “E përsëris edhe një herë, thjesht për informacionin tuaj dhe kërshëri shkencore: në Organizatën e Bashkëpunimit Islamik nuk votohet”, tha ministri Bushati në përgjigje të shqetësimit të ngritur nga deputeti demokrat Tritan Shehu.