Para takimit për Ballkanin, Basha vizitë në Londër me ftesë të May
Kryetari i opozitës, Lulzim Basha, ndodhet në Londër në konferencën e organizuar nga konservatorët britanikë mbi sfidat në Ballkanin Perëndimor. Basha ndodhet në Britaninë e Madhe me ftesë të Kryeministres Theresa May dhe do të zhvillojë atje takime me parlamentarë, drejtues dhe zyrtarë të lartë të Qeverisë britanike. Sipas një njoftimi të shpërndarë nga selia blu lidhur me këtë angazhim të Lulzim Bashës, sqarohet se objektivat e konferencës në të cilën do të bëhen bashkë drejtues të lartë politikë nga Ballkani, janë forcimi i marrëdhënieve mes partive të djathta dhe shpalosja e një vizioni të përbashkët për të ardhmen e rajonit. Kjo vizitë e kreut të PD- së Basha dhe drejtuesve të tjerë politikë nga Ballkani Perëndimor në Londër vjen disa muaj para se Qeveria britanike të mirëpresë takimin vjetor të Procesit të Berlinit, i cili këtë vit do të zhvillohet në Londër. Mungesa e kreut të opozitës në seancën plenare të ditës së enjte u shfrytëzua nga maxhoranca, e cila e lidhi këtë vizitë me negociatat që Basha po bën për të rregulluar bilancet e PD- së në KQZ. Ishte kreu i Grupit të PS- së, Taulant Balla, që pretendoi se Basha ndodhet në Edinburg, qytetin në të cilin ndodhet kompania guaskë që pagoi 675 mijë euro për lobim të Partisë Demokratike në Shtetet e Bashkuara të Amerikës gjatë zgjedhjeve parlamentare të 25 qershorit. Përpara largimit për në Britaninë e Madhe, kreu i PD- së ka apeluar për herë të fundit maxhorancën të ndalë procesin e zgjedhjes së Prokurorit të Përgjithshëm. Basha ka kujtuar se maxhoranca po shkel Kushtetutën dhe se nuk ka kompetencë të zgjedhë kreun e organit të akuzës, pasi sipas Kushtetutës këtë të drejtë e ka Këshilli i Lartë i Prokurorisë.