Projekti “Bëjmë detyrat e shtëpisë”, ushqim pas mësimit për nxënësit
Shkollat do të jenë të hapura edhe pas përfundimit të procesit mësimor, duke u ofruar mundësinë nxënësve që të konsumojnë vaktin e drekës, të argëtohen një pjesë të kohës, si edhe të kryejnë detyrat e shtëpisë. Kështu, një ditë e zakonshme mësimi nuk do të përfundojë në 13: 00, por 4 orë më vonë, në 17: 00. Projekti “Bëjmë detyrat e shtëpisë” do të shtrihet në këtë fazë të parë pilotimi në 20 shkolla të vendit, përkatësisht në Tiranë, Elbasan, Lezhë, Fier dhe Korçë, me qëllimin për t’u shtrirë në të gjitha shkollat 9- vjeçare. Gjatë këtij orari shtesë, do të angazhohen mësues të posaçëm të cilët do të asistojnë nxënësit në kryerjen e detyrave. “E rëndësishme është që ne të avancojmë në përgatitjen dhe cilësinë në arsim, pasi edhe nxënësit që vijnë nga familje me mundësi të pakta ekonomike, ashtu sikurse edhe të gjithë nxënësit e tjerë, bashkëmoshatarët e tyre, do të kenë të njëjtin burim nga vjen informacioni edhe në përgatitjen e detyrave të shtëpisë. Pra do të jenë mësues të dedikuar për këtë proces”, tha ministrja e Arsimit, Lindita Nikolla. Vakti pas mësimit nuk do të jetë i detyrueshëm për të gjithë nxënësit. Prindërit që do të kenë interes do të duhet të paguajnë vetë një pjesë të faturës, ndërkohë për familjet në nevojë mbështetja do të ofrohet nga bashkitë. Dje, me iniciativë të Ministrisë së Bujqësisë, është firmosur edhe marrëveshja e përbashkët mes ministrave Peleshi, Nikolla dhe Manastirliu për sigurinë ushqimore, edukimin dhe ushqyerjen e shëndetshme të fëmijëve. “Përmes këtij projekti synojmë të krijojmë një aleancë të re, të krijojmë një aleancë me fëmijët, të cilët pastaj do të përçojnë mesazhet edhe te prindërit apo gjyshërit e tyre se si duhet të kontrollohet një ushqim, se si duhet të bindemi që një ushqim është i shëndetshëm, ose duhet të kërkohet të jetë i tillë”, tha ministri i Bujqësisë, Peleshi. Nga ana tjetër, ministrja e Shëndetësisë Ogerta Manastirliu u ndal në mënyrën e të edukuarit të konsumimit të vakteve nëpër shkolla, duke u kthyer në një kulturë jetese. “Përfshirja e programeve të tilla bëhet në kuadër dhe të krijimit të zakoneve të mira, që më pas, transferohen edhe në të ardhmen te të rriturit, pra fëmijët bëhen të rritur dhe fitojnë zakone, në lidhje me mënyrën e të ushqyerit, që ndikon shumë edhe në shëndetin e shoqërisë. Ajo që unë dua të theksoj është që në këtë proces, Ministria e Shëndetësisë do të kujdeset për të gjithë menynë”.