Falsifikohen mijëra metra tokë në bregdetin e Dhërmiut
Prokuroria sekuestron pronën, një pjesë edhe në Palasë
Prokuroria e Vlorës ka lëshuar dje urdhrin për sekuestrimin e një sipërfaqeje rreth 4 800 metra tokë në zonë e bregdetit të Palasës dhe Dhërmiut.
Siç mësohet, kjo sipërfaqe toke ndodhet në një pjesë të konsiderueshme në bregdet dhe pjesa tjetër në kodër. Sipërfaqja më e madhe e tokës mësohet se ndodhet në zonën e Dhërmiut dhe është në pronësi të shtetasit A. Dhimogjika. Urdhri për sekuestrimin e tokës është lëshuar nga Prokuroria e Vlorës, pasi dyshohet se ajo është përfituar me dokumente false. Sipas të dhënave nga Prokuroria, hetimi për këtë sipërfaqe toke ka nisur rreth një vit më parë. Tashmë nën hetim për sipërfaqen e tokës së sekuestruar janë edhe disa persona të tjerë, identiteti i cilëve nuk bëhet i ditur. Por nuk përjashtohet fakti që në hetim të merren edhe persona nga Hipoteka e Vlorës, të cilët kanë regjistruar këtë pronë në emër të personave të tjerë.
Prokuroria e Vlorës konfirmon se hetimet kanë nisur rreth një vit më parë, pas një ankese dhe denoncimi të ardhur mbi përvetësimin e sipërfaqes së tokës në zonën e Palasës dhe Dhërmiut, ndërsa hetimet kanë qenë intensive. Referuar hetimeve të nisura, burime nga Prokuroria kanë saktësuar se ka pasur informa- cione të cilat çojnë në përfundimin se toka mund të jetë përfituar me dokumente të falsifikuara, tokë e cila është në pronësi të shtetasit A. Dhimogjika. Për momentin, Prokuroria konfirmoi se është lëshuar vetëm urdhri i sekuestrimit për 4800 metra tokë, ndërsa hetimet vijojnë ende dhe shumë shpejt personat që mund të jenë përgjegjës do të arrestohen. “Hetimin e kemi nisur rreth një vit më parë pas denoncimit të një qytetari. Gjatë hetimit është konstatuar se ndaj kësaj prone janë kryer falsifikime të shumta në dokumentacion, ndaj deri në procedimet e mëtejshme që do të kryhen ndaj personave përgjegjës, u vendos që të sekuestrohet fillimisht prona, me qëllim që të mos kryhen më veprime që kanë të bëjnë me shitblerje të saj”, bënë të ditur burime nga Prokuroria. Sipas të dhënave paraprake, dyshohet se prona është tjetërsuar sa i përket emrit të pronarit dhe më pas është shitur një pjesë e saj edhe te persona të tjerë që kanë qenë të interesuar. Tashmë dosja dhe veprimet që janë kryer nga Hipoteka e Vlorës janë duke u hetuar.