Pranga shefit të kufirit, 400 euro për kalimet ilegale
GJIROKASTER – Shefi i Ruajtjes së Kufirit të Gjelbër në Drejtorinë e Policisë Kufitare Gjirokastër dhe ndihmësi i tij kanë përfunduar në pranga bashkë me një person të tretë, pasi lejonin kalimin ilegal të qytetarëve drejt Greqisë. Pas një hetimi disamujor nga Shërbimi për Çështjet e Brendshme dhe Ankesat në Ministrinë e Brendshme, pas informacioneve të siguruara për kalimin e shtetasve shqiptarë dhe të huaj, përmes kufirit të gjelbër drejt Greqisë në mënyrë ilegale, u bë edhe arrestimi i tre të akuzuarve. Strukturat e SHÇBA- së arrestuan në flagrancë Timo Çikon, 50 vjeç, shef i Ruajtjes së Kufirit të Gjelbër në Drejtorinë e Policisë Kufitare Gjirokastër; Bledar Duçkën, 43 vjeç, trup shërbimi për kufirin e gjelbër dhe Shpëtim Brakajn, 41 vjeç, nga Fieri. Kundrejt pagesave që varionin nga 300- 400 euro për çdo person, punonjësit e Policisë në vijën kufitare siguronin kushtet për të kaluar drejt vendit fqinj në mënyrë ilegale, pa kryer procedurat ligjore. Personat që kalonin ilegalisht kufirin ndërmjetësoheshin me punonjësit e Policisë nga 41vjeçari Brakaj. Qytetarët që kalonin përmes pagesave te rrjeti i dyshuar i trafikuesve, e kishin të pamundur të udhëtonin në zonën “Shengen” për shkak të problemeve me afatet e shkelura kohore, apo mospërmbushjen e kushteve të kalimit të lirë. Gjatë arrestimit në flagrancë, të ndaluarve u janë sekuestruar një sasi eurosh, lekësh, dollarësh, telefona celularë dhe 1 automjet. Ndërkohë, SHÇBA vijon hetimet për zbulimin e personave të tjerë të përfshirë në këtë rrjet. p. n.