Nga burgu në burg, sërish në pranga kleptomani Saleo
Pak ditë pasi rifitoi lirinë, vodhi 3 biçikleta në Tiranë
Saleo Stojani, kleptomani “i tmerrshëm” i akuzuar për qindra vjedhje që prej moshës 12- vjeçare, është vënë sërish në pranga nga Policia e Tiranës.
Edhe pse burgu i ka hequr disa vite lirie që kur “u rrit” mjaftueshëm për të mbajtur përgjegjësi ligjore, vesin për të vjedhur nuk mundi t’ia heqë dot. Vetëm pak ditë pasi rifitoi lirinë dhe doli nga burgu, Saleo, sot 24- vjeçar, u kthye sërish në qeli. Sërish për vjedhje, ashtu si në shumicën e rasteve kur është arrestuar nga Policia. Burimet thanë se ai akuzohet për vjedhjen e 3 biçikletave në zonën e tij “të preferuar”, atë që mbulon Komisariati nr. 3 i Policisë së Tiranës. Thuajse 90 për qind të vjedhjeve që ka realizuar në kryeqytet, që kur ishte i mitur, i ka kryer në territorin që mbulon ky komisariat. Për shumëkënd ai njihet si i mituri i tmerrshëm që vidhte gjithçka dhe gjithmonë ia hidhte paq, kjo edhe për shkak të mosfunksionimit të një institucioni riedukimi për të mitur. Madje, edhe pse në moshë të mitur, ai kishte filluar ta mësonte këtë “hile” dhe sa herë që ndalohej pas vjedhjes së radhës, policëve u thoshte: “Do të vjedh prapë sepse nuk më kap ligji. Kur të rritem, nuk vjedh më”. Por Saleo nuk e mbajti këtë “premtim”. Edhe pasi u rrit, u arrestua e u burgos disa herë, ai prapë nuk hoqi dorë nga “vesi” i tij për të vjedhur. Madje, veç akuzës së përhershme që ngrihej ndaj tij, vitet e fundit ai u akuzua edhe për krime më të rënda.
KRIMET Deri në vitin 2010, kur në komunikatat e Policisë shfaqen emri i Saleo Stojanit, edhe akuza bashkëngjitur tij ishte ajo e njohur për të gjithë, “vjedhja”. Por arrestimi i tij i radhës, ai i datës 18 tetor 2010, nuk ishte më për këtë vepër penale. Saleo u dyshua se u përfshi në një krim të rëndë, vrasjen e një polici në Vlorë. Për këtë ngjarje ai u arrestua bashkë me dy persona të tjerë, edhe pse kurrë nuk e pranoi se ishte fajtor për këtë ngjarje. Ai pranoi se polici e kishte kapur duke vjedhur në një sallameri në Vlorë, por se nuk ishte autori i vrasjes. E megjithatë, nuk pranoi të tregonte autorin, edhe pse ai ishte arrestuar nga Policia. Për këtë arsye, Saleo u dënua me 1 vit burg për moskallëzim krimi. Kur ishte 21 vjeç, në vitin 2014, emri i tij doli sërish në skenë. Edhe këtë herë për një krim më të rëndë se vjedhja. Teksa po vuante dënimin në Burgun e Drenovës, bashkë me të dënuarin Enea Shkoza plagosin rëndë të burgosurin, Dritan Lushka. Ky i fundit u dërgua drejt Tiranës në gjendje kritike për jetën, ndërsa dy autorët u dënuan për plagosjen e tij.