Biznesmen në Shkodër, kapet me 1 ton kanabis në Mal të Zi
Ndue Pepaj, pronar i restorantit luksoz “Kavaliero” në Bajzë
Policia e Malit të Zi ka shkatërruar një grup të trafikut të drogës, ku në pranga përfunduan 11 persona, mes së cilëve një 28- vjeçar nga Malësia e Madhe.
Gjatë operacionit “Trick”, bëhet e ditur se është vënë në pranga Ndue Pepaj, ndërsa 10 personat e tjerë janë shtetas të Malit të Zi. 28- vjeçari njihet në zonën e Malësisë së Madhe si biznesmen pasi është pronar i një restorant luksoz me emrin “Kavaliero” në zonën e Bajzës. Përveç kësaj, Pepaj është dhe i angazhuar në politikë pasi rezulton si kandidat për anëtar të Këshillit Bashkiak në Malësinë e Madhe si përfaqësues i Lëvizjes Socialiste për Integrim në zgjedhjet lokale të vitit 2015. Policia shqiptare bën të ditur se hetimet për këtë rast janë kryer në bashkëpunim të plotë me Policinë e Malit të Zi, Qendrën për Bashkëpunim Rajonal SELEC, Rumani, ku gjatë hetimeve, këtij grupi i janë sekuestruar sasi të konsiderueshme lëndë narkotike Cannabis Sativa, Heroinë e armë zjarri. Konkretisht, përveç 11 personave të arrestuar, është sekuestruar një sasi prej 928 kg lëndë narkotike kanabis sativa, 1.7 kg heroinë si dhe 3 kg përzierës heroine. Policia shqiptare nuk jep më shumë detaje në lidhje me këtë aktivitet kriminal pasi hetimet janë ende në vijim. Pepaj akuzohet nga drejtësia e Malit të Zi si kreu i grupit kriminal të strukturuar, që merrej me trafikimin e drogës nga Shqipëria në Malin e Zi. Hetimet kanë nisur që prej një viti, ndërsa 28vjeçari nga Malësia e Madhe është vënë në pranga ditën e diel. Kurse të hënën u arrestuan tre shqiptarët e tjerë nga Tuzi, Gjon Junçaj, Vasel Junçaj dhe Violeta Junça. Përveç drogës, Policia, gjatë kontrolleve të ushtruara në banesat e të arrestuarve, ka sekuestruar dhe automjete luksoze si dhe një armë zjarri, e cila ishte groposur në bahçen e një shtëpie në lagjen Konik të Podgoricës, ndërsa do i nënshtrohet aktit të ekspertizës pasi dyshohet se mund të jetë përdorur në kryerjen e vrasjeve në Mal të Zi.