Kryeprokurori, Berisha zbulon negociatat: Ka pasur takime, pse nuk u ra dakord

Ish- kryeministri Sali Berisha ka deklaruar se për çështjen e zgjedhjes së Prokurorit të Përgjithshëm të Përkohshëm ka pasur takime përgatitore mes përfaqësuesve të Kryeministrit Rama dhe kreut të opozitës Lulzim Basha. I ftuar në emisionin "360 gradë" në "Ora News" të gazetarit Artur Zheji, Berisha ka deklaruar se kanë qenë ambasadorët ata që kanë influencuar në këtë proces. "Studimi i Opdatit edhe i Euraliusit, i pakërkuar nga Parlamenti. Morën atributet e Gjykatës Kushtetuese të vendit. Morën atributet e Presidentit të Republikës, të Parlamentit, s'ia kërkoi asnjeri. Çfarë ishte ftesa? Ishte një kurth i ulët, i turpshëm, në të cilin zoti Basha dhe asnjë politikan nuk mund të binte. Ftesa ishte vetëm për të thënë që e provuam dhe ky s'deshi, hajde zbresim te 36 deputetët. Ai është i gatshëm të ulet barkas dhe të bëjë çdo lëshim. Në këto kushte e ftonte. Çfarë tha Lulzim Basha? Po, plotësisht dakord. Hajde të ulemi të përcaktojmë procedurën ligjore që do ndjekim dhe që s'mund të ishte kurrë nën 3/ 5 dhe pastaj të procedojmë me emrin. Jo, i thanë ndërmjetësim Lulzim Bashës. Do fillohet me emrin, se pastaj ju mund ta bllokoni. Basha i tha, po n. q. s i bllokojmë, përcaktojmë po në ligj mekanizmin antibllokim. Janë bërë takime përgatitore. Basha ishte shumë serioz në atë që thoshte. Kurse përfaqësuesi i Edi Ramës thoshte: Se kështu na thonë ambasadorët", ka deklaruar Berisha. Kryeministri nuk foli për Kryeprokuroren e zgjedhur Arta Marku, pasi sipas tij, sot, në krye të organit të akuzës është Kryeministri Edi Rama. "Këtu nuk ka asnjë emër. Është vetëm Edi Rama, që do të bëhet Kryeprokuror. Unë kur përdorja termin narkoshtet, isha i vetmuar, ndërsa sot është një emër i ndërkombëtarizuar. Kjo zgjedhje po asgjëson institucionin. Rama me këtë zgjedhje, ka një qëllim, do të mbyllë dosjen Tahiri se është dora e tij. Për sa i përket Kryeprokurores, është një emër i nderuar nga familja e saj, nuk kam asgjë kundra me të", ka theksuar ish- kryeministri. Berisha ka sulmuar edhe ambasadorët e SHBA dhe BE në Shqipëri, Lu dhe Vlahutin, për lidhjet me Kryeministrin Edi Rama. "Në konflikt të hapur interesi. Lu dhe Vllautin, që është e vërtetë që ata përfaqësojnë SHBA dhe Europën, por është aq e vërtetë që ata janë dhe përfaqësues të Edi Ramës. Kanë tejkaluar çdo lloj kufiri, që ata janë në mbështetje të Edi Ramës. U dhunua një deputete, a tha një fjalë shkëlqesia e tij? Kërpaçi ishte dhuna aty, nuk ishte gjë më të shëmtuar përgjakja e një deputeteje. E shikon me këtë optike se ka një anësi ekzemplare", sqaroi ish- kryeministri. Berisha e quajti legjitim për situatën, në të cilën kaloi Parlamenti, edhe vendimin e kryetares së LSIsë për të goditur kreun e qeverisë Rama me këpucë. "Sigurisht. Ka një gjë, në atë që quhet përgjegjësi, për çdo akt që kryen, njeriu mban përgjegjësi se do ketë një përgjigje. Para se të kryesh një akt, ti duhet të mendosh përgjigjen. Në vend se të ngrihej, le të thoshte kush e përgjaku deputeten, vajzën e re? Dhe të jepte të gjitha udhëzimet. Vinte e shante aty me fjalorin e ordinerit dhe hëngri çizmen, siç e meritoi", tha Berisha.