Ahmetaj: Programi synon vetëpunësimin e të rinjve
Kursimi i energjisë, Gjiknuri: Projekti edhe në godinat qeveritare
Qeveria shqiptare dhe ajo gjermane nënshkruan dje marrëveshjet financiare për promovimin e punësimit dhe arsimit profesional dhe për eficencën në energji. Të pranishëm ishin ministri i Financave dhe Ekonomisë, Arben Ahmetaj, ministri i Infrastrukturës dhe Energjisë, Damian Gjiknuri, ambasadorja e Gjermanisë në Shqipëri, Susanne Schütz, kryetari i Bashkisë Tiranë, Erion Veliaj si dhe përfaqësuesit e GIZ dhe KfW. Marrëveshja e parë qeveritare i referohet akordimit të një fondi grant në masën 6 milionë euro për financimin e programit “Zhvillimi ekonomik dhe rajonal, promovimi i punësimit dhe trajnimi e arsimimi profesional”, që u nënshkrua nga Ministri Ahmetaj dhe ambasa- dorja gjermane Schütz. “Objektivi i kryesor i Programit është përmirësimi i situatës së vetëpunësimit të punës së kualifikuar, në veçanti të të rinjve në lidhje me tregun lokal të punës. Përmirësimet do të kryhen në të gjitha rajonet e Shqipërisë, në sektorë të përcaktuar, nëpërm- jet ndërhyrjeve në dy drejtime: në ndërmarrjet mikro, të vogla dhe të mesme dhe së dyti, në projektet për investime”, u shpreh ministri Ahmetaj. Programi i dytë i financuar nga qeveria gjermane është ai për “Rehabilitimin e konvikteve në Universitetin e Tiranës, sipas parimit të eficiencës së energjisë”, për të cilin u nënshkruan marrëveshjet financiare dhe marrëveshjet e veçanta, që përfshijnë edhe Ministrinë e Infrastrukturës dhe Energjisë si palë zbatuese, dhe Bashkinë e Tiranës si përfituese. Vlera financiare e dhënë në formë granti nga qeveria gjermane në këtë marrëveshje, arrin në 6.5 milion euro, ndërsa aktualisht është në fazë zbatimi projekti i mëparshëm në vlerën 9 milionë euro. Ministri i Infrastrukturës dhe Energjetikës, Damian Gjiknuri tha se projekte të tilla do të shtrihen në të gjitha godinat qeveritare. Edhe kreu i bashkisë Erion Veliaj deklaroi se investime të tilla do të shtrihen edhe në objekte të tjera nën administrim të Bashkisë së Tiranës.