KUSH U PREK
Administrata e presidentit Donald Trump, të martën, publikisht fajësoi Korenë e Veriut për një sulm “të pakujdesshëm dhe të pamatur” kibernetik, që ka infektuar mijëra kompjuterë në mbarë botën.
Sulmi besohet se ka prekur 150 vende të botës dhe ka shënjestruar banka dhe kompani të mëdha shtetërore e private në maj të këtij viti. Një nga dëmet më të mëdha ishte se paralizoi pjesë të Shërbimit Shëndetësor Kombëtar të Britanisë. Këshilltari për Sigurinë Kombëtare të Shtëpisë së Bardhë, Tom Bossert u tha gazetarëve në një konferencë, se Koreja e Veriut ishte drejtpërdrejt përgjegjëse për sulmin me ryshfete nëpërmjet “WannaCry” dhe se Peniani zyrtar do të jepte llogari për këtë. “Ky ishte një sulm i pakujdesshëm dhe i pamatur. Sulmi “WannaCry” goditi më shumë se 150 vende në muajin maj, duke mos lejuar hapjen e dokumenteve dixhitale dhe duke kërkuar një shpërblim për rihapjen e tyre. Ai goditi Shërbimin Shëndetësor Kombëtar të Britanisë, ku ngriu kompjuterë në spitale, mbylli dhomat e urgjencës e ndali trajtimin mjekësor. Zyrat e qeverisë në Rusi, Spanjë e vende të tjera u mbyllën. Po ashtu, edhe universitetet aziatike, hekurudhat kombëtare të Gjermanisë dhe kompani globale. Ai preku individët, industrinë, qeveritë dhe pasojat ishin përtej ekonomisë. Kompjuterët e prekur keq në Mbretërinë e Bashkuar, në sistemin e tyre të kujdesit shëndetësor vënë jetën në rrezik, jo vetëm para”, tha Bossert. Ai shtoi se zbulimi që përgjegjësia e sulmit është e Koresë së Veriut, bazohet në prova dhe konfirmohet nga kompani të tjera private dhe nga qeveri të huaja, duke përfshirë Mbretërinë e Bashkuar, Australinë, Kanadanë, Zelandën e Re dhe Japoninë. Sipas tij, “Microsoft” e gjurmoi sulmin deri te bashkëpunëtorë kibernetikë të qeverisë së Koresë së Veriut. Gjetjet vijnë në një kohë kur SHBA po përpiqet të frenojë programin bërthamor dhe kërcënimet nga qeveria e Kim Jong Un. “Koreja e Veriut ka vepruar shumë keq, në mënyrë kryesisht të pakontrolluar, për më shumë se një dekadë ... sjellja e saj keqdashëse po bëhet më e egër. Dhe ndalimi i kësaj sjelljeje të keqe fillon me këtë hap të llogaridhënies”, tha ai.