Basha pret në zyrë Lu: Kundërshtim i prerë për Kryeprokurorin
“Opozita do qëndrojë në përputhje me parimet themelore të demokracisë amerikane”
Kryetari i Partisë Demokratike e cilësoi antikushtetues zgjedhjen e Prokurores së re Arta Marku.
Basha ka pritur në zyrën e tij për më shumë se 60 minuta ambasadorin e SHBA- ve Donald Lu, me të cilin ka diskutuar për reagimet e ashpra të opozitës gjatë dhe pas zgjedhjes së Prokurores së Përgjithshme të Përkohshme. Zyra e shtypit e Partisë Demokratike, pas takimit, njofton se “Kryetari i opozitës Lulzim Basha i përcolli dje ambasadorit amerikan Donald Lu kundërshtimin e prerë të Partisë Demokratike për zgjedhjen antikushtetuese të një Prokurori të Përgjithshëm të Përkohshëm”.
Sipas selisë blu, zgjedhja e Prokurores së Përkohshme përbën një puç antikushtetues. “Në një takim në selinë e Partisë Demokratike, zoti Basha bëri të qartë se moskrijimi i Këshillit të Lartë të Prokurorisë, uzurpimi i kompetencave të KLP- së nga Parlamenti, zgjedhja e një Prokurori të Përgjithshëm me shumicë të thjeshtë, zgjedhja e Prokurores pa kaluar Vetingun, janë puç antikushtetues, i cili ka futur në krizë sistemin e drejtësisë, ka shkatërruar procesin politik në vend dhe po prodhon një krizë destabilizuese për vendin”, thuhet në njoftimin e selisë blu.
Duket se në qendër të takimit me ambasadorin Lu, kanë qenë dhe qëndrimet e Ambasadës së SHBA- ve për protestën e opozitës.
“Kryetari Basha theksoi se interesat e shqiptarëve dhe të SHBA- ve shërbehen vetëm duke dënuar kthimin e Shqipërisë në një vend të drogës dhe krimit, duke mos toleruar lidhjet e qeveritarëve me drogën dhe krimin dhe duke kërkuar nxjerrjen para drejtësisë të tyre”, thuhet në njoftimin e zyrës së shtypit për takimin Basha - Lu. Edhe pse paralajmërimet nga Ambasada Amerikane janë për ruajtje të qetësisë nga ana e partive politike, duket se kryetari Basha e ka siguruar am- basadorin Lu se opozita do të vijojë reagimin e saj me mjete dhe forma demokratike. “Kryetari i opozitës e siguroi ambasadorin Lu se në përputhje me parimet më themelore të demokracisë amerikane, opozita dhe qytetarët shqiptarë do të qëndrojnë me të gjitha mjetet dhe format demokratike në mbrojtje të Kushtetutës dhe demokracisë dhe kundër kapjes së drejtësisë nga Edi Rama, klanet e drogës dhe grupet kriminale që bash- këqeverisin me të”, thuhet në njoftimet e zyrës së shtypit të PD- së. Për kreun e PD- së, zgjedhja e Prokurores së re nga Edi Rama bëhet me qëllim prishjen e hetimeve ndaj Saimir Tahirit. “Zoti Basha pohoi se të gjitha këto veprime kanë qenë të paramenduara dhe të planifikuara nga Edi Rama për të zgjedhur një Kryeprokuror që kontrollohet plotësisht prej tij, me qëllim shkatërrimin e hetimeve për dosjet kriminale të Saimir Tahirit, Vangjush Dakos dhe politikanëve të tjerë të lidhur direkt me vetë Ramën”, vijon njoftimi i selisë blu. Kreu i PD- së ka garantuar ambasadorin Lu për “qëndrimin e pandryshueshëm të PD- së për të bërë të gjitha përpjekjet që vendi t’i rikthehet kushtetueshmërisë dhe politikanët e lidhur me krimin, nga Saimir Tahiri te Vangjush Dako, të përfundojnë para drejtësisë”. “Asnjë kompromis dhe asnjë interes pragmatik politik nuk do ta ndryshojë këtë qëndrim”, u shpreh Basha. SHBA menjëherë pas votimit të Prokurores së Përkohshme në Parlament, dënoi elementët e dhunës në sallën e Kuvendit dhe jashtë saj. “Ambasada e Shteteve të Bashkuara dënon me forcë dhunën që ndodhi në protestën e sotme në Tiranë. Ne mbështesim të drejtën e qytetarëve për të protestuar paqësisht, por dëmtimi i pronës publike, hedhja e granatave tymuese në Parlament dhe dhuna nuk janë të pranueshme. Ne u bëjmë thirrje të gjitha partive që të tregojnë vetëpërmbajtje dhe të nxisin qetësi”, thuhej në njoftimin e Ambasadës Amerikane.