Në tavolinën e Ramës sot ka një kobure

Pasika siguruar Parlamen tin që do, pasi ka siguruar edhe Policinë që do, Rama...

ka sot edhe Prokurorinë që do. Të gjitha këto nuk janë asgjë më pak se një kobure në tavolinën e tij. Me këtë kobure ose do të vrasë shokët, ose do të vrasë veten. Për rreth tre vjet, Rama e ka fshehur veten pas reformës në drejtësi. Pas kësaj reforme është përpjekur të fshehë gjithë abuzimin e panjohur më parë të pushtetit të tij. Pas kësaj reforme dhe në emër të kësaj reforme kërkoi timonin dhe e bleu në ankandin e 25 qershorit. Duke përdorur si kryefjalë reformën në drejtësi, përdori gjithë aparatin agjitativ për të demonizuar opozitën. Duke u shitur si kampioni i reformës në drejtësi, Rama siguroi edhe tolerancën e ndërkombëtarëve.

Tashmë ai i ka të gjitha. Me hir dhe me pahir, me ligj dhe pa ligj, me Kushtetutë dhe pa Kushtetutë, Rama ka sot instrumentet që e bëjnë reformën në drejtësi realitet. Përpjekjet e opozitës që kjo reformë të mbahet brenda kornizës kushtetuese dhe parimeve të drejtësisë herë u shpërblyen e herë u refuzuan me arrogancën e maxhorancës. Mirënjohja dhe mirëkuptimi për këtë qëndrim parimor të opozitës mungoi. Shpesh opozita nuk u kuptua dhe akoma më shpesh u paragjykua. Këtë fat pati edhe beteja e fundit për ligjshmërinë e zgjedhjes së Kryeprokurores. Gjithsesi, opinioni i publikut të gjerë dhe i partnerëve ndërkombëtarë nuk është një stigmë fatale. Një gjë është e qartë, ky opinion sot e tutje nuk mund të jetë më nën ndikimin e paragjykimeve dhe demonizimit që i është bërë opozitës. Kjo alibi ra.

Këtej e tutje, Rama nuk do të ketë pas çfarë të fshihet. Këtej e tutje, opinioni i gjerë dhe partnerët nuk do të kenë asnjë mundësi të ngatërrojnë përgjegjësit. Këtej e tutje duhet të ndëshkohet abuzimi i pushtetit. Këtej e tutje, ne fillojmë të numërojmë ditët mbrapsht si ushtarët. Ka një kalendar që rri mbi kokën e kryepushtetarit, tashmë dhe kryeprokuror, mbi kokën e Ramës. Këtë kalendar ia ka përcaktuar duke ia ka lexuar në shqipen e Konicës edhe fort i nderuari ambasadori Lu. Nga janari, sikur ia caktoi startin për peshqit e mëdhenj. Ka edhe një afat nga BE që lidhet me negociatat, por që kusht kanë reformën në drejtësi. Reforma në drejtësi nuk është zgjedhja e Kryeprokurorit, por është ndëshkimi, është kapja e “peshqve të mëdhenj”. Reformë në drejtësi që nuk ndëshkon përfshirjen e qeveritarëve dhe policisë në krimin e kanabizimit të vendit nuk mund të ketë. Reformë në drejtësi që nuk heton dhe ndëshkon kontratat korruptive si ato për inceneratorët e plehrave, për monitorimin e basteve, për dializën, për check- up, e për sa e sa të tjera nuk mund të ketë.

Këto i di mirë Rama. Ndaj pamja e mumizuar e tij në seancën e fundit nuk ishte vetëpërmbajtje, por vetëdije se po konsumohej edhe akti i fundit pas të cilit mund të fshihej edhe për pak kohë. Ai dëshironte që opozita ta digjte Parlamentin. Ai donte të fitonte simpatinë e viktimës për sa më gjatë. Dhe e tentoi këtë. Provokoi sa mundi. Opozita protestoi ashpër, por në kufijtë e vetëpërmbajtjes së forcës. Do të mbahet mend fotoja e Kryeprokurores që betohej pas çadrës dhe përballë refuzimit agresiv të opozitës. Perdja e aktit të fundit ra.

Tashmë Rama ka Policinë, ka edhe Prokurorinë. Madje ka edhe Shërbimin Informativ. Tashmë i ka të gjitha që i duhen që të hetojë e të ndëshkojë. Ka edhe denoncimet kapicë të opozitës dhe të medias dhe i mbetet vetëm të lëvizë gishtin. Të bëjë realitet drejtësinë, pasi reforma u bë.

Unë besoj se edhe Rama e ka të qartë se në tryezën e tij qëndron koburja që ai duhet t’ua drejtojë shokëve të qeverisë me të cilët ka kanabizuar dhe korruptuar Shqipërinë për pesë vjet me radhë. Nëse nuk e bën, zëre se ia drejtoi vetes të parit.

Por, nëse çështja e Tahirit mbyllet, nëse nuk hetohet skandali i kontratave të plehrave dhe sa e sa të tjerave, atëherë shqiptarët do kenë një reformë, por jo një drejtësi. Unë besoj fort se shqiptarët presin që kjo reformë, edhe ashtu arbitrare siç u bë, duhet të shërbejë për pastrimin e politikës nga krimi dhe korrupsioni.

Opozita ka pasur kauzë të vetën pastrimin e politikës nga krimi. Në mbështetjen pa rezervë të kësaj kauze opozita është sakrifikuar, por nga sot ajo është e çliruar nga çdo paragjykim si penguese. Ndaj ajo gjithnjë e më zëshëm do të presojë fort për ndëshkimin e krimit dhe korrupsionit. Nga sot, opozita do të ketë gjithnjë e më shumë mbështetje, ndërsa Rama gjithnjë e më pak ditë në dispozicion.

Opozita dhe mbështetësit e saj, publiku i gjerë që nuk qëndron i rreshtuar me asnjë palë, si dhe partnerët ndërkombëtarë do të kërkojnë rezultatet konkrete. Nëse këto nuk vijnë, atëherë drejtësia do të kërkohet dhe do të bëhet ndryshe. * Sekretar për Burimet Njerëzore, PD

Tashmë Rama ka Policinë, ka edhe Prokurorinë. Madje ka edhe Shërbimin Informativ. Tashmë i ka të gjitha që i duhen që të hetojë e të ndëshkojë. Ka edhe denoncimet kapicë të opozitës dhe të medias dhe i mbetet vetëm të lëvizë gishtin. Të bëjë realitet drejtësinë, pasi reforma u bë. Unë besoj se edhe Rama e ka të qartë se në tryezën e tij qëndron koburja që ai duhet t’ua drejtojë shokëve të qeverisë me të cilët ka kanabizuar dhe korruptuar Shqipërinë për pesë vjet me radhë. Nëse nuk e bën, zëre se ia drejtoi vetes të parit