Kryeprokurorja e re, Nishani: Forca e pushtetit e grisi Kushtetutën

Ish- Presidenti Bujar Nishani e cilëson procesin e zgjedhjes së Kryeprokurores së Përgjithshme si një akt barbar të dhunimit të Kushtetutës. Përmes një reagimi në llogarinë e tij në facebook, Nishani shkruan se përmes këtij akti Qeveria dëshmoi se si e gris në mënyrë publike Kushtetutën e Shqipërisë. “Akti i fundit i dhunimit të Kushtetutës së Shqipërisë përbën aktin më të rëndë të dhunës shtetërore mbi sistemin shoqëror dhe zyrtarizmit të modelit se si forca pushtetmbajtëse shkatërroi Kodin dhe mekanizmin që garanton jetën e çdo individi si dhe dinjitetin e integritetin e një shteti. Rasti i Prokurorit të Përgjithshëm nuk është thjesht “një shkelje e Kushtetutës”. Jo! Brutalisht forca e pushtetit e grisi në mënyrë publike Kushtetutën e Shqipërisë! Ajo u gris me vullnet të plotë politik, me dhunë, me qëllim dominimin e pushtetit të drejtësisë nga pushteti ekzek- utiv. Kjo është situata politike më e rëndë dhe më e trishtueshme që nga koha e diktaturës në Shqipëri”, shprehet Nis- hani. Sipas ish- presidentit, shqiptarët duhet të ngrihen për të mbrojtur Kushtetutën dhe rivendosur garancitë e së drejtës dhe lirive. “Tani kërkohet me çdo kusht rivendosja e garancive të së drejtës dhe lirive. Rivendosja e garancisë së Kushtetutës është disa dimensionalëshe: Ligjore, politike dhe morale. Por nuk ka alternativë tjetër, veçse të rivendoset. Kjo është detyrë e shumicës së shqiptarëve dhe përgjegjësi politike dhe institucionale e opozitës. Kush mendon se mund të trembë me burg përpjekjen për rivendosjen e garancive kushtetuese, veç bëhet qesharak. S’ka alternativë tjetër! Nuk ka burg që e mbyll atë”, deklaron Nishani.