Aleatët sfidojnë SHBA, Shqipëria mes vendeve kundër Trump në OKB
Ambasadorja e SHBA: Do ta kujtojmë këtë ditë, ne e shohim votën si personale, po mbajmë shënim emrat
Shqipëria ishte mes vendeve që sfiduan vendimin e SHBA- ve për të njohur Jerusalemin si kryeqytetin e Izraelit, në një votim të mbajtur në Asamblenë e Përgjithshme të Kombeve të Bashkuara.
U votua me 128 vota pro, 35 abstenim, dhe 9 kundër, për të miratuar një mocion që refuzon vendimin e SHBA- ve për të njohur Jerusalemin si kryeqytetin e Izraelit. Vendimi u mor pavarësisht se Presidenti amerikan kërcënoi të shkurtojë miliarda dollarë ndihmë që u jep ndaj vendeve që kanë guxuar ta sfidojnë atë. Trump kishte thënë para votimit se po e shikojmë rezultatin. Një javë më parë, Shqipëria ishte pjesëmarrëse në Samitin urgjent të Organizatës së Bashkëpunimit Islamik, në Stamboll, ku u miratua rezoluta kundër vendimit të SHBA- ve për Jerusalemin. Ndërsa Nikki Haley, përfaqësuesja e SHBA- ve në OKB, kishte paralajmëruar se SHBA do të mbante shënim emrat dhe se do ta merrte personale mënyrën e votimit. Ambasadorja dhe bashkëshorti i saj me origjinë shqiptare, të mërkurën raportohet se ishin të pranishëm në një pritje të Konsullatës së Përgjithshme të Kosovës në Nju Jork, ku ajo kishte premtuar se Shtetet e Bashkuara do të angazhoheshin fuqishëm për njohje të tjera të pavarësisë së Kosovës. Vetëm shtatë vende: Guatemala, Hondurasi, Togo, Mikronezia, Nauru, Palau dhe Ishujt Marshall ishin ato që u bashkuan me Izraelin dhe Shtetet e Bashkuara. Jo gjithë të tjerët votuan kundër, 35 vende abstenuan dhe mes tyre edhe vende evropiane, si Kroacia, Republika Çeke, Hungaria, Letonia, Rumania, Polonia dhe Bosnjë- Hercegovina. Kjo e fundit, edhe pse një vend mysliman që supozohet se duhej t’i ishte përgjigjur thirrjes së vendeve islamike kundër vendimit të SHBA- ve, u gjet mes “dy zjarreve” m pasi SHBA e ka çliruar nga konflikti me Serbinë. Rezoluta u dërgua për votim në Asamblenë e Përgjithshme nga nismëtarët e saj, pasi iu vu veto nga Shtetet e Bashkuara në Këshillin e Sigurimit të hënën, edhe pse të 14 anëtarët e tjerë të Këshillit votuan në favor të saj. Rezultati nuk u prit aspak mirë nga SHBA- të. “Shtetet e Bashkuara do ta kujtojnë këtë ditë”, tha ambasadorja amerikane në OKB, Nikki Haley. “Amerika do ta vendosë ambasadën tonë në Jerusalem. Asnjë votë në Kombet e Bashkuara nuk do të bëjë ndonjë ndryshim për këtë. Por ky votim do të bëjë dallimin se si populli amerikan do ta shikojë OKB- në dhe se si do t’i shikojmë vendet që nuk na respektojnë në OKB”, tha ajo. “Kur ne japim kontribute bujare në OKB, ne gjithashtu kemi një shpresë legjitime që vullneti ynë i mirë të njihet dhe respektohet”, ka shtuar Haley. Ndonëse rezolutat e Asamblesë së Përgjithshme nuk janë të detyrueshme, një votë e fortë mbart peshën politike. Presidenti i Palestinës, Mahmoud Abbas, e quajti rezultatin e votimit një fitore, ndërsa Kryeministri izraelit, Beniamin Netanjahu, e quajti Organizatën e Kombeve të Bashkuara “shtëpia e gënjeshtrave”.