Të moshuarit i futen me maskë në banesë, i marrin paratë e pensionit

SARANDE- Një ngjarje e rëndë është regjistruar mesnatën e së enjtes në fshatin Muzinë, bashkia Finiq. Një person i maskuar ka hyrë rreth orës 03: 30 të së enjtes në banesën e shtetasit Kosta Shapo, 72 vjeç, banor i fshatit Muzinë. Grabitësi i ka bërë fillimisht presion dhe më pas e ka goditur atë në fytyrë e stomak me qëllim që t’i tregonte vendin se ku i moshuari mbante paratë. Nën kërcënim dhe goditje ka arritur t’i marrë atij të vetmet lekë që kishte të pensionit, tri kartëmonedha 5 mijë lekëshe, në total 15 mijë lekë të rinj, dhe është larguar. 72vjeçari Kosta Shapo jeton i vetëm, pasi bashkëshortja ka disa vite që i ka vdekur, ndërsa është edhe invalid, me një këmbë. Pas njoftimit kanë shkuar në vendngjarje shërbime policore të Sarandës dhe të Postës së Policisë Livadhja. Ndërsa i dhunuari është dërguar në spitalin e Sarandës për mjekimin e nevojshëm. Sipas bluzave të bardha, në spitalin e Sarandës, i dëmtuari 72- vjeçar Kosta Shapo është jashtë rrezikut, por ai ka qenë në një gjendje mjaft të traumatizuar për shkak të ngjarjes së ndodhur. Ende nuk ka asnjë informacion për identifikim apo kapje të personit grabitës, ndërsa mësohet se janë shoqëruar 4 persona në Komisariatin e Policisë në Sarandë. Paraprakisht, Policia ka dyshime se autori është banor i fshatit, ose i zonës përreth, i cili ka qenë në dijeni të faktit se i moshuari ishte i vetëm dhe për më tepër edhe invalid dhe jo në gjendje për t’u vetëmbrojtur. “Ishte një person me maskë që është futur natën në shtëpi. U tmerrova kur e pashë, ndërsa më kërcënoi dhe më dhunoi që t’i tregoja se ku i kisha fshehur paratë. Unë jam invalid dhe nuk isha në gjendje të vetëmbrohesha. Më mori paratë e pensionit dhe më pas u largua”, është shprehur në Polici i moshuari. sh. d.