Harron ngrohësen ndezur gjatë natës, digjet në banesë e moshuara 85 vjeçe

KORÇE – Një e moshuar ka humbur jetën në mënyrë tragjike, pasi banesa ku jetonte u përfshi nga zjarri. Ngjarja ka ndodhur gjatë orëve të vona të së mërkurës në fshatin Bitinckë të rrethit të Devollit. 85- vjeçarja Shyqyrete Bletaj jetonte e vetme dhe nga hetimet paraprake dyshohet se zjarri në banesën e saj është shkaktuar nga një rezistencë elektrike, të cilën e moshuara e përdorte për t’u ngrohur për të përballuar temperaturat e ulëta të ditëve të fundit. Pas përhapjes së flakëve, ndërkohë që Bletaj ndodhej në gjumë, kanë qenë fqinjët e saj që kanë njoftuar zjarrfikësen për atë që po ndodhte. Pavarësisht ndërhyrjes së kësaj të fundit, nuk ka qenë i mundur shpëtimi i së moshuarës, e cila sipas fqinjëve vuante edhe nga skleroza. Pas fikjes së zjarrit, grupi hetimor ka nisur të bëjë konstatimet përkatëse ku paraprakisht dyshohet se ngjarja ka qenë aksidentale, ndërsa po punohet për zbardhjen e rrethanave të ng- jarjes. Sipas Policisë, e moshuara mund ta ketë harruar ngrohësen ndezur ndërsa e ka zënë gjumi pranë saj. Përhapja e flakëve më pas ka shkaktuar asfiksimin e saj, duke i shkaktuar vdekje të menjëhershme pavarësisht ndërhyrjes së shpejtë për shuarjen e flakëve. Si pasojë e rënies së zjarrit, shtëpia 2katëshe ku e moshuara jetonte e vetme është djegur thuajse plotësisht. “Rreth orës 22: 30, kemi marrë njoftim se në fshatin Bitinckë- Devoll ka rënë zjarr në banesën e shtetases Sh. B., rreth 85 vjeçe. Në vendin e ngjarjes ka shkuar Zjarrfikësja, për të bërë të mundur fikjen e zjarrit, si edhe shërbimet e Policisë. Por, si pasojë e flakëve ka gjetur vdekjen shtetasja e mësipërme, e cila jetonte e vetme në këtë banesë. Nga hetimet paraprake dyshohet se kemi të bëjmë me ngjarje aksidentale”, bën të ditur Policia.