Trump- i i vërtetë
Pas një serie dështimesh, republikanët në Kongres, më në fund, ia dolën të shënojnë fitoren e tyre të parë me ligjin për reformën tatimore.
Trump dhe partia e tij në muajt e ardhshëm, padyshim, do ta festojnë këtë si përmbushje të premtimit të tyre elektoral, që do të ndikojë për “ta bërë Amerikën të madhe”. Por e kanë gabim, ashtu sikurse tregojnë disa studime të pavarura.
Në fakt, reforma fiskale në radhë të parë do të pasurojë edhe më shumë të pasurit. Sipas një studimi të qendrës së pavarur “Tax Policy Center”, në vitin 2027, viti i fundit i reformës, më të pasurit, një përqind e popullsisë në të ardhmen do përfitojnë 82 për qind nga kursimet e taksave. Arsyeja është, se shumica e rregullave të tjera, të përfshira në reformën tatimore, kanë një afat më të shkurtër. Por edhe sikur ligji me uljen e parashikuar të taksave të hyjë në fuqi vitin e ardhshëm për të gjitha shtresat, pesë përqind e amerikanëve do të paguajnë më shumë taksa se tani dhe ata që do të përfitojnë më shumë janë të pasurit. “OBAMACARE” ME SHKURTIME
Sidoqoftë nuk do të ketë lehtësime masive fiskale për sipërmarrjet, të pasurit dhe për familjen Trump. Një pjesë, shpesh, e anashkaluar e reformës, prek shtresën e nivelit më të ulët të mesëm dhe të varfërit, që gjithsesi përfitojnë pak nga lehtësimet fiskale. Një element i rëndësishëm i sigurimit shëndetësor “Obamacare” me këtë reformë do të shfuqizohet. Eshtë fjala për gjobat, që duhet të paguajë ai që nuk ka sigurim shëndetësor. Pa këtë masë bonuset e sigurimit do të rriten dhe sipas një vlerësimi të kongresit dhjetë milionë njerëz do të dalin nga sistemi. Kjo do të bëjë që sërish një numër i madh njerëzish të jenë pa sigurim shënde- tësor, duke e rrezikuar funksionimin në përgjithësi të “Obamacare”. E pikërisht shfuqizimi i sigurimit shëndetësor “Obamacare”, që pavarësisht problemeve u ka mundësuar sigurim shëndetësor miliona amerikanëve, prej kohësh është një objektiv i rëndësishëm i republikanëve. Me reformën fiskale ata i afrohen edhe më shumë qëllimit të tyre.
Por ligji i prek qytetarët e nivelit mesatar edhe në një formë tjetër, që shpesh nuk vihet re. Reforma fiskale, sipas vlerësimeve, në një afat prej dhjetë vjetësh mund ta rrisë me më shumë se një miliardë dollarë deficitin buxhetor. Të njëjtët politikanë, që qëndrojnë pas ligjit të miratuar tani, pikërisht për këtë arsye do të thërrasin tani për shkurtimin masiv të shpenzimeve për të ekuilibruar deficitin në rritje. Por shkurtimi i shpenzimeve prek pikërisht të varfërit dhe të moshuarit. TRUMP DEMASKON VETVETEN
Për Trump reforma fiskale do të thotë edhe fundi zyrtar i rolit të vetëshpallur si avokati i njerëzve të thjeshtë. Tani, më në fund, kushdo e di se ku ndodhet vërtetë Trump. Përkundër retorikës që përdorin, tani del vërtetë në pah që republikanët kanë mbështetjen e koncerneve të mëdha. Kjo nuk është gjë e re. Por është domethënëse, që republikanët, të cilët dikur kanë qenë krenarë për disiplinën buxhetore, tani e kanë injoruar këtë virtyt dhe kanë miratuar një ligj, që do të shtojë në mënyrë masive deficitin.
Tek e fundit ky ligj u krijon një avantazh demokratëve për zgjedhjet e ardhshme për Kongresin dhe ato presidenciale. Ky ligj i dëmshëm mund të shmanget sërish me një votim të thjeshtë në Kongres. Se si do t’ia dalin dhe nëse do të kenë vet një plan realist - kjo mbetet tani detyra e demokratëve, që pas humbjes së tyre ndaj Trump- it, ende janë duke u marrë me rikuperimin e vetvetes.