“Luarasi” merr akreditimin për 6 vite, renditet ndër katër universitetet më të mira
“Ambicia jonë është të shtojmë fakultetin e Teknologjive të Informacionit, njëkohësisht të ngremë edhe shkollën doktorale”
Investimi në infrastrukturë dhe staf pedagogjik, puna e pakursyer dhe performanca e shënuar vit pas viti kanë shpërblyer Kolegjin Universitar “Luarasi” me akreditim të plotë, duke e renditur në listën e 4 universiteteve më të mira në vendin tonë.
Rektori, prof. dr. Et’hem Ruka pohon se gjatë vitit të ardhshëm akademik, “Luarasi” do të zgjerojë ofertën e tij akademike duke punuar për hapjen e fakultetit të ri të Teknologjisë së Informacionit dhe Inovacionit, gjithashtu dhe për ciklin e tretë të studimeve.
Agjencia e Sigurimit të Cilësisë në Arsimin e Lartë, Bordi i Akreditimit ka vlerësuar pozitivisht Kolegjin Universitar “Luarasi” duke dhënë vendimin për akreditim të plotë, pra për 6 vite…
Sot ( dje) u njoftuam zyrtarisht nga Agjencia e Akreditimit për vendimin që ata kanë marrë lidhur me Kolegjin Universitar “Luarasi”. Sipas këtij vendimi të marrë në 15 dhjetor të këtij viti, institucioni ynë është akredituar me 6 vite. Është një vlerësim maksimal dhe një tregues i qenësishëm pasi kemi të bëjmë me një vlerësim jo vetëm kombëtar, por edhe ndërkombëtar, i cili ka kaluar në disa etapa dhe u është nënshtruar vëzhgimeve dhe monitorimeve të vazhdueshme. Këtë privilegj, më duhet të theksoj, e kanë pasur vetëm 4 institucione të arsimit të lartë në vendin tonë, çka do të thotë se ne jemi një ndër 4 IAL- të mira në vend. Ky është një lajm tepër pozitiv dhe duhet lexuar si një arritje në një kohë që arsimi i lartë ka lënguar në gjithë këto vite nga shumë sëmundje të njohura tashmë për publikun. Me këtë rast duhet të falënderoj të gjithë ata që kanë punuar seriozisht për të siguruar këtë rezultat. Kjo meritë i takon stafit akademik të këtij universiteti, u takon studentëve që kanë mbaruar dhe ata që janë në proces, të cilët kanë qenë pjesë e vlerësimit në kuadër të akreditimit. Merita, pa diskutim u takon atyre që kanë drejtuar këtë universitet nga themelimi deri në ditët e sotme dhe pa diskutim edhe grupit “Hysenbelliu”, që e ka parë universitetin “Luarasi” jo si një ndërmarrje për të sjellë fitime, por si një institucion i arsimit të lartë me një pikëpamje filantropike duke nxitur dhe promovuar lirinë akademike. Janë të gjitha këto arsye që kanë dhënë vulën e sigurisë për arritjen e këtij rezultati. Misioni ynë është ta çojmë përpara këtë traditë dhe pa diskutim, të shënojmë suksese të reja.
Cilat janë objektivat e mëtejshme?
Ky institucion ndodhet përpara një sfide të madhe për të kaluar nga statusi i kolegjit universitar në universitet, që do të thotë se aktualisht universiteti ka tri fakultete dhe ne kemi parashikuar të shtojmë fakultetin e Teknologjive të Informacionit dhe të Komunikimit, njëkohësisht të ngremë edhe shkollën doktorale. Kjo është një punë kolosale, jo thjesht në planin e letrave dhe dokumenteve, të cilat në bazë të ligjit duhet të dorëzohen deri më datë 28 shkurt, por është një angazhim që kërkon para së gjithash një përgatitje të madhe për lëndët që do të zhvillohen, për profesorët që do të japin mësim etj. Me këtë rast, universiteti bën edhe një ofertë për të marrë profesorë të nderuar në fushën e Drejtësisë, në fushën e Ekonomikut dhe në fushën e Teknologjive të Informacionit. Shpresoj që gjithçka të ecë mirë dhe vitin tjetër ky institucion të jetë jo kolegj, por universitet.
Ambicia është që kjo të bëhet e mundur vitin e ardhshëm, a ka kapacitete për ta bërë “Luarasi” këtë?
Sigurisht, “Luarasi” ka kapacitetet për ta vënë në zbatim këtë projekt dhe po punojmë që kjo të bëhet e mundur vitin e ardhshëm akademik. Të gjithë planin që kemi bërë, ia kemi paraqitur edhe kompanisë “Hysenbelliu group”. Kemi gjetur të gjithë mbështetjen dhe topi është në fushën tonë si institucion, për të çuar drejt finalizimit këtë objektiv. Për sa na takon, jemi të bindur që do të realizojmë gjithçka në kohën e duhur. Shpresojmë që Ministria e Arsimit të ketë nxjerrë të gjitha aktet nënligjore që ka në proces dhe që lidhen me riorganizimin e institucioneve të larta arsimore, veçanërisht me hapjen e shkollës doktorate, meqenëse është e bllokuar prej gati 4 vitesh.
Ju përmendët disa nga objektivat që lidhen me institucionin, sa u takon studentëve, çfarë do të përfitojnë ata?
Dëshira ime është që ky universitet të mos jetë i mbyllur, duhet të marrë jetë dhe jetë merr kur disiplinat që zhvillohen në Drejtësi dhe Ekonomik kanë qasje me problematikat, por çfarë është më e rëndësishmja, me nevojat që ka tregu sot. Studentët e Juridikut është me rëndësi të ndjekin nga afër proceset gjyqësore në Gjykatën e Lartë, në Gjykatën Kushtetuese, të dinë si përgatiten ligjet në Parlament, si diskutohen në komisione, cilat janë debatet që zhvillohen në qeveritë lokale etj. Është një praktikë e mrekullueshme, që ne e kemi filluar dhe do ta çojmë përpara. Njëkohësisht, ftojmë lektorë që punojnë në fushën e drejtësisë për të ndarë përvojën e tyre me studentët tanë. Jo vetëm kaq, por i kemi nxitur pedagogët që të stimulojnë gjyqe brenda universitetit në mënyrë që studentët të vihen në rolin e një gjyqtari të ardhshëm. Unë besoj se këto janë praktika që e bëjnë mësimin shumë atraktiv. Të njëjtën procedurë ndjekim dhe aplikojmë me fakultetin Ekonomik dhe studentët që kanë zgjedhur këtë profil studimi.
Në fund të ditës, çfarë ka rëndësi është punësimi. Sa i mundur është ky dhe çfarë avantazhesh kanë studentët e “Luarasit” në këtë drejtim?
Ne jemi pjesë e një kompanie të madhe siç është “Hysenbelliu group”. Ky rrjet ofron mundësi edhe për punësimin e menjëhershëm të studentëve. Një mundësi tjetër është edhe punësimi pranë universitetit, pra, studentët më të mirë e kanë gjithnjë një derë të hapur. Diplomat e Drejtësisë që merren te “Luarasi” janë diplomat më të mira të drejtësisë në vend. Kjo është garanci për integrimin e tyre në tregun e punës, pavarësisht vështirësive dhe konkurrencës që dominon.
Jemi në fundvit dhe zakonisht bëhet bilanci i punës. Si ka qenë ky vit për Kolegjin Universitar “Luarasi”?
Unë jam një drejtues i ri në këtë institucion, ndonëse kam qenë miqësor duke e ndjekur nga jashtë. Ajo që dua të them është se, kam gjetur një institucion që është ngritur në radhë të parë mbi baza të forta ligjore, ku gjithçka është perfekte nga ana e dokumentacionit. Kjo do të thotë që, çdo diplomë që del nga ky institucion, është një dokument i vlefshëm, jo si kartonët që janë lëshuar nga universitete private, të cilat nuk ekzistojnë më. Kam gjetur, po ashtu, një staf akademik të mrekullueshëm dhe të përgjegjshëm, që janë të gatshëm të marrin përgjegjësitë për të arritur objektivat që kemi vënë për vitin e ardhshëm.
Ky institucion ndodhet përpara një sfide të madhe për të kaluar nga statusi i kolegjit universitar në universitet, që do të thotë se aktualisht universiteti ka tri fakultete dhe ne kemi parashikuar të shtojmë fakultetin e Teknologjive të Informacionit dhe të Komunikimit...