Bushati: Vota jonë në OKB nuk është kundër SHBA- ve
“Qëndrim i konsoliduar i Shqipërisë në OKB, si në votimin e 2012 dhe 2013"
Ministri i Jashtëm, Ditmir Bushati, e cilësoi votë jo kundër SHBA- ve votimin nga Shqipëria të rezolutës së OKB- së.
“Vota e Shqipërisë dje në Asamblenë e Përgjithshme të Kombeve të Bashkuara nuk është një votë kundër SHBAve, por është në linjë të plotë me qëndrimet e shumicës dërrmuese të vendeve anëtare të OKB- së, NATO- s dhe BE- së, partnerë historikë të SHBA- ve”.
Kështu shkruan ministri për Europën dhe Punët e Jashtme, Ditmir Bushati, në rrjetin social “Facebook”. Sipas tij, vota e Shqipërisë lidhej me një qëndrim parimor dhe të pandryshuar në vite ndaj rezolutave të OKB- së në sinkron me pjesën dërrmuese të vendeve anëtare. “Në politikë të jashtme nuk e kemi luksin të mos dallojmë faktet nga trillimet. Për ata që ende besojnë te faktet, vota e Shqipërisë dje në Asamblenë e Përgjithshme të Kombeve të Bashkuara nuk është një votë kundër SHBAve, por shprehje e qëndrimit tonë koherent, parimor e të pandryshuar në vite, bazuar në konsensusin ndërkombëtar të shprehur në dokumentet e panumërta të OKBsë dhe rezoluta të Këshillit të Sigurimit, të cilat kanë fuqi detyruese, sikundër në linjë të plotë me qëndrimet e shumicës dërrmuese të vendeve anëtare të OKB- së, NATO- s dhe BE- së, partnerë historikë të SHBA- ve”, shkruan Bushati. Ai thekson se “fakt është që rezoluta, pro së cilës votoi Shqipëria dje, u referohet rezolutave të mëparshme të Këshillit të Sigurimit”. “Më konkretisht, Rezoluta 252 e vitit 1968, Rezoluta 476 e vitit 1980, Rezoluta 478 e vitit 1980 dhe më e fundit, Rezoluta 2334 e vitit 2016. Këto rezoluta janë bërë pjesë e korpusit të normave ndërkombëtare dhe rrjedhimisht janë të detyrueshme për ne”, shprehet ministri Bushati. Kryediplomati shqiptar nënvizon po ashtu se “Shqipëria ka votuar në mënyrë konstante pro rezolutave të OKB- së në lidhje me procesin e paqes në Lindjen e Mesme, në tërësi, dhe në veçanti pro rezolutës specifike që trajton çështjen e vendbanimeve në territoret e pushtuara, përfshi Jeruzalemin Lindor, në Asamblenë e Përgjithshme të OKB- së. Ky qëndrim i konsoliduar i Shqipërisë ka qenë e mbetet i njëjtë, pavarësisht se kush ka qenë në drejtim të punëve të shtetit, përfshi këtu votimin në vitin 2012 dhe në vitin 2013 e deri sot, si shumica dërrmuese e vendeve të OKB- së”. Ai i cilësoi trillime të ditës qëndrimet e opozitës se Shqipëria votoi kundër Shteteve të Bashkuara të Amerikës dhe propozimit të Presidentit Trump. “Fakt është, vijon ministri i Jashtëm, se “parimet, orientimi dhe qëndrimet në politikën e jashtme të një vendi janë shumë më të qëndrueshme, sesa trillimet e atyre, të cilët përpiqen të minojnë gurin themeltar të partneritetit tonë me SHBA- të në fushën e forcimit të shtetit ligjor dhe të demokracisë në Shqipëri, që është reforma në drejtësi”. “Hannah Arendt ka pasur të drejtë kur thoshte se e keqja më e madhe e një shoqërie nuk është nazisti i bindur e as komunisti i devotshëm, por të gjithë ata për të cilët dallimi mes fakteve dhe trillimeve, të vërtetave dhe gënjeshtrave, nuk ekziston”, përfundon postimi i Bushatit.