Meta kundër Ramës, letër Trump: Keqardhje për votën kundër SHBA në OKB
Presidenti: Vota nuk pasqyron vullnetin e kombit, qeveria nuk u konsultua. Do kërkoj personalisht shpjegime për këtë qëndrim
Presidenti i Republikës, Ilir Meta, i ka shprehur keqardhje Presidentit të Shteteve të Bashkuara të Amerikës, Donald Trump, për votën e Shqipërisë në Kombet e Bashkuara në favor të rezolutës që rrëzoi vendimin amerikan për të njohur Jerusalemin si kryeqytet të Izraelit.
Përmes një letre të dërguar këtë të premte, kreu i shtetit shqiptar i konfirmon Presidentit Trump se vendimi për të votuar kundër aleatit dhe mikut të shqiptarëve, Shteteve të Bashkuara të Amerikës, është bërë pa asnjë konsultim me institucionin e Presidencës dhe Kuvendit të Shqipërisë. “Dëshiroj të shpreh keqardhjen e madhe për votën e Shqipërisë dje në OKB kundër aleatit dhe mikut tonë më të madh, Shteteve të Bashkuara të Amerikës. Kjo votë është marrë pa asnjë konsultim paraprak me institucionin e Presidentit të Republikës së Shqipërisë dhe as me Kuvendin e Shqipërisë, dhe nuk pasqyron qëndrimin dhe vullnetin e popullit dhe kombit shqiptar, i cili nuk harron dhe nuk do të harrojë asnjëherë mbështetjen e SHBA- ve në momentet më të vështira të ekzistencës së tij”, shkruan Meta në letrën drejtuar Trump. Meta e ka siguruar Presidentin e SHBA- ve se do të kërkojë personalisht sqarime për qëndrimin e mbajtur nga Qeveria shqiptare. Sipas kreut të shtetit shqiptar, vendimi i Qeverisë për të votuar kundër SHBA- ve bie ndesh me marrëdhëniet e partneritetit tonë strategjik dhe interesat tona kombëtare. “Do të kërkoj personalisht shpjegime dhe sqarime për këtë qëndrim dhe vendim të qeverisë, që bie ndesh me marrëdhëniet e partneritetit tonë strategjik dhe interesat tona kombëtare”, sqaron Meta në mesazhin e tij, i cili ishte në përgjigje të urimeve që Presidenti Trump i dërgoi Shqipërisë në 105- vjetorin e Pavarësisë. Qëndrimin që Meta do të mbante ndaj votës së Shqipërisë në Asamblenë e OKB- së e paralajmëroi edhe një deklaratë e zëdhënësit të Presidencës, Tedi Blushi, i cili konfirmoi se institucioni i Presidencës nuk ishte informuar për qëndrimin që do të mbahej. “Presidenti i Republikës nuk është konsultuar dhe informuar paraprakisht lidhur me qëndrimin që do të mbahej ndaj kësaj çështjeje të rëndësishme, jo vetëm për politikën e jashtme të Shqipërisë, por për mbarë kombin shqiptar. Presidenti vlerëson se ky qëndrim dhe kjo votë kundër, tërësisht e panevojshme, nuk pasqyron një qëndrim shtetëror dhe aq më tepër një qëndrim e konsensus mbarëkombëtar. Presidenti thekson se nuk duhet të harrojmë se SHBA- të mbeten aleati dhe partneri më i rëndësishëm strategjik, ndaj qëndrime e vendime të tilla duhet të jenë të mirëkoordinuara.