Papanastasiou: Prioritet mbetet rritja e cilësisë së shërbimit
Këshilli Drejtues i Alpha Bank Albania SH. A. ka emëruar Georgios Papanastasiou si Kryetar të këtij Këshilli dhe Drejtor të Përgjithshëm të Alpha Bank Albania SH. A., i cili pason në detyrë Periklis Drougkas. Ndryshimi hyri në fuqi më 20 dhjetor 2017. Periklis Drougkas ka qenë Drejtor i Përgjithshëm i Alpha Bank Albania SH. A. që prej vitit 2012. Ai ka një formim profesional të zhvilluar përgjatë një karriere prej katër dekadash si drejtues i lartë në pozicione ekzekutive në sektorin e shërbimeve financiare. Gjithashtu, Drougkas është Kryetar i Shoqatës Shqiptare të Bankave, President i Shoqatës së Biznesit Grek në Shqipëri dhe anëtar i Dhomës Greke të Ekonomistëve. “Ka qenë një privilegj të isha Drejtor i Përgjithshëm i Alpha Bank Albania SH. A. përgjatë pesë viteve të kaluara”, tha Drougkas. Drejtori i Përgjithshëm i sapozgjedhur, Georgios Papanastasiou. tha se në fokus së punës së tij do të jenë rritja e cilësisë së shërbimit për klientët. “Ky ndryshim vjen në një moment të rëndësishëm zhvillimi për Alpha Bank Albania, ku rrugëtimi ynë drejt përmirësimit të modelit të biznesit, rritjes së cilësisë së shërbimit për klientët tanë si edhe pozicionimit tonë në një treg në ndryshim të vazhdueshëm, është në nivele të kënaqshme. Ndihem i nderuar që kam mundësinë të drejtoj Alpha Bank Albania në të ardhmen. Zoti Drougkas ka qenë një katalizator i ndryshimeve në Alpha Bank Albania duke drejtuar bankën përgjatë pesë viteve të fundit drejt përmirësimit të vazhdueshëm. Jam i angazhuar që të vazhdoj në këtë drejtim dhe të udhëheq ekipin tim drejt mundësive të shumta që kemi përpara”, tha Georgios Papanastasiou. Zoti Georgios Papanastasiou ka punuar për më shumë se tri dekada në sektorin bankar në rajonin e Europës Juglindore, më konkretisht në Greqi, Maqedoni, Serbi dhe tashmë në Shqipëri.