Ishte në koma prej një jave, vdes në Francë i riu shkodran
Babai: Djali ka shenja teli në fyt, është vrasje profesionistësh
Një 23- vjeçar nga Shkodra, i cili prej 2 vitesh qëndronte në Francë ku kishte kërkuar azil, ndërroi jetë mbrëmjen e djeshme në një spital në Marsejë, ku prej një jave ndodhej në gjendje kome.
Florenc Beqiraj, i cili dyshohet se është masakruar në një paraburgim të Marsejës, kishte kaluar në vdekje klinike dhe sipas mjekëve, ai po mbahej në jetë me aparatura, për heqjen e të cilave duhej të firmosin familjarët. Por i ati i të riut, Gëzim Beqiraj, ka refuzuar të firmosë. Mediat franceze shkruanin se i riu kishte pak mundësi për të jetuar pasi klinikisht ai është i vdekur. Në fakt, mbrëmjen e djeshme mjekët i kanë hequr aparaturat e në këtë formë ai ka ndërruar jetë. Ngjarja e ndodhur më 14 dhjetor, në mediat lokale është raportu- ar si një tentativë vetëvrasje në qelitë e paraburgimit, ku ai mbahej në pritje të depërtimit drejt Shqipërisë, pasi kishte refuzuar të kthehej vullnetarisht. Nga ana tjetër, miqtë e tij dhe familjarët japin një version tjetër në rrjetet sociale. Sipas tyre, ai është masakruar nga persona të tjerë dhe nuk ka tentuar të vrasë veten. Babai i tij është shprehur se Florenci ka shenja teli në fyt dhe në duar, çka, sipas tij, shpjegon se kemi të bëjmë me një vrasje profesionistësh.
EMIGRANTI Florenc Beqiraj është i biri i Gëzim dhe Laureta Beqiraj, i datëlindjes 27 shtator 1994 nga lagja “Iliria”, Shkodër, djalë i vetëm i familjes Beqiraj. Ai kishte 2 vjet që ndodhej në Francë dhe ishte në procedura për azil. Sipas “Press Independent”, Florenci kishte filluar punë si kamerier në një lokal në Marsejë. Ai është ndaluar nga Policia franceze për një mjet identifikimi dhe për shkak të mungesës së tij ai është shoqëruar në ambientet e ko- misariatit. Për rreth një muaji është mbajtur në Polici dhe më 14 dhjetor oficerët e kanë dorëzuar si të vdekur në duart e doktorëve të spitalit në Marsejës. Spitali i ka vendosur tubat e oksigjenit dhe mbahej në reanimacion, ku sipas të afërmve, kërkohet një pjesëtar i familjes. Babai i Florencit, Gëzim Beqiraj, është nisur për në Francë, nga Mali i Zi, ku jeton bashkë me familjen. Shqiptarët në Francë i kërkojnë Prokurorisë së Marsejës që të hapen kamerat e sigurisë së burgut për të verifikuar se si ka ndodhur realisht ngjarja me Florenc Beqiraj.