Votimi në OKB, Meta, Basha dhe Berisha kundër vendimit të Qeverisë
Vota e Shqipërisë në Organizatën e Kombeve të Bashkuara kundër vendimit të Administratës së Presidentit të SHBAve, Donald Trump, për të njohur Jerusalemin si kryeqytetin e Izraelit, ngjalli jo pak reagime në politikën shqiptare. Ky veprim detyroi Presidentin e Republikës, Ilir Meta, që t’i dërgojë një letër Presidentit Donald Trump për të sqaruar se vendimi nuk ishte konsultuar me të dhe as me Parlamentin. “Vota kundër aleatit dhe mikut tonë të madh, është marrë pa asnjë konsultim paraprak me institucionin e Presidentit të Republikës dhe as me Parlamentin e Shqipërisë dhe nuk pasqyron qëndrimin dhe vullnetin e popullit dhe kombit shqiptar, i cili nuk harron dhe nuk do të harrojë asnjëherë mbështetjen e SHBA- ve në momentet më të vështira të ekzistencës së tij”, thuhet në letrën e Metës. Ndërkohë, që Kryeministri Rama nuk ka dhënë asnjë shpjegim publik për këtë qëndrim të ri të Shqipërisë. Nga ana tjetër, lideri i opozitës, Lulzim Basha e ka quajtur qëndrimin e qeverisë shqiptare si veprim kundër interesit kombëtar. “Duke votuar kundër SHBA, qeveria ka vepruar kundër interesit kombëtar të shqiptarëve. Interesi i Shqipërisë dhe i kombit shqiptar, deri më sot, janë shërbyer në avancimin e tyre nga një aleat strategjik dhe ato janë Shtetet e Bashkuara të Amerikës”, ka thënë kreu i PD. Këtë votë, ministri i Jashtëm, Ditmir Bushati, e ka quajtur si votë pro Bashkimit Europian dhe jo kundër SHBA- ve. “Shqipëria i është përmbajtur konsensusit ndërkombëtar mbi Jerusalemin, bazuar në një numër të konsiderueshëm dokumentesh të OKB- së, përfshirë një numër rezolutash të Këshillit të Sigurimit dhe i është bashkuar pozicionit të përbashkët të shumicës dërrmuese të vendeve anëtare të BE, duke i qëndruar koherente qëndrimit të saj të linjëzuar me BE”, thuhet në reagimin e Ministrisë së Jashtme. Por për këtë argument të MPJ- së, kreu i PD- së ka thënë se Bashkimi Europian nuk ia ka kushtëzuar votën Shqipërisë, ndaj dhe disa vende të BEsë votuan për të mbrojtur marrëdhëniet me SHBA- në. Ndërsa ish- kryeministri Berisha e ka quajtur si pafytyrësi politike votën e qeverisë kundër SHBA në OKB.