Biznesmeni në ‘ arrest shtëpie’ dhunon 28- vjeçaren
FIER- Një biznesmen në Fier ka përfunduar në pranga, pasi ka thyer masën e "arrestit të shtëpisë" dhe ka goditur me grusht një vajzë 28- vjeçare. Policia e Fierit bëri të ditur se ka ndaluar shtetasin me inicialet O. H, 36 vjeç, banues në Fier. "Më datë 24.12.2017, u ndalua shtetasi O. H, 36 vjeç, banues në Fier, me masë sigurie "Arrest shtëpie", pasi në lagjen "8 Shkurti", është larguar nga vendi i qëndrimit dhe ka goditur me grusht shtetasen O. A., 28 vjeçe, banuese në Lushnje. Nenet 323/ 1, 321/ 1 e 90 të Kodit Penal"- njofton Policia. Sipas të dhënave, O. Hebeje është emër i njohur për Policinë, pasi në vitin 2014 ai u arrestua pasi me kamionët e firmës së tij ishin transportuar 59 kg heroinë drejt Turqisë. Arrestimi i tij u krye me urdhër të Prokurorisë së Krimeve të Rënda, pas vendimit të dhënë nga Gjykata. I arrestuari është pronar i një kompanie gazi dhe një tjetër kompanie që tregton pjesë këmbimi automjetesh. Me kërkesë të Prokurorisë së Krimeve të Rënda, Gjykata kishte vendosur masën e sigurisë "arrest me burg" për Hebejën, me akuzën e trafikut ndërkombëtar të lëndëve narkotike. Por duket se Gjykata pas disa proceseve gjyqësore e ka ndryshuar masën e dhënë ndaj tij nga ajo në burg, me "arrest shtëpie". Nuk konfirmohet se çfarë ka ndodhur konkretisht mes tij dhe 28- vjeçaren, të cilën e ka dhunuar. Dyshohet se mes tyre ka pasur një lidhje dhe konflikti, për motive ende të paqarta, mes tyre ka precipituar deri në dhunë. Policia ka vepruar duke e ndaluar 36- vjeçarin dhe gjatë hetimeve të kryera, ka rezultuar se ai ishte arrestuar edhe më parë dhe se me vendim të Gjykatës së Krimeve të Rënda, ai ndodhej në arrest shtëpie.