Siguria, pezullohen lejet e fundvitit për të burgosurit
Këtë fundvit, të burgosurit nuk do të mund të marrin dot leje shpërblyese për të kaluar festat e fundvitit me familjarët e tyre. “Panorama” mëson se Drejtori i Përgjithshëm i Burgjeve, Arben Çuko, ka nxjerrë një urdhër të brendshëm që ndalon për këtë fundvit lejet shpërblyese për të burgosurit. Burimet thonë se shkak për këtë vendim ka qenë ngjarja e ndodhur në Shkodër disa ditë më parë, ku një person u ekzekutua pranë varrezave, nga një i dënuar që kishte marrë leje. Kjo ngjarje e ka detyruar Drejtorin e Përgjithshëm të Burgjeve të marrë masa drastike për lejet shpërblyese, duke i pezulluar përkohësisht ato për çështje sigurie. Çdo vit, të burgosurit që janë dënuar për vepra të lehta penale, kanë marrë leje shpërblyese për festat e fundvitit. Ndërkohë, disa javë më parë, ministrja e Drejtësisë, Etilda Gjonaj, u shpreh se këtë vit nuk do të ketë amnisti nga dikasteri që ajo drejton për të burgosurit. Ajo tha gjithashtu se në amnistitë e ardhshme, Ministria e Drejtësisë do të propozojë që të përjashtohen të dënuarit për dhunë në familje. Por, fjala e fundit për këtë i takon Kuvendit, i cili ka në dorë ta miratojë ose jo propozimin. “Nuk është përcaktuar nëse do të ketë këtë vit amnisti. Jemi pak vonë, kështu që nuk besoj se në 2017- n do të ketë një amnisti drejtuar Parlamentit. Nuk do të ketë, por ajo që është më e rëndësishme, në çdo lloj amnistie që mund të pro- pozohet nga Ministria e Drejtësisë, rastet e dhunës në familje nuk do të gjejnë vend në të. Pastaj, fjalën e fundit do ta ketë Kuvendi nëse do ta miratojë propozimin e Ministrisë së Drejtësisë për përjashtimin e rasteve të dhunës në familje në amnisti”, tha ministrja Etilda Gjonaj në një prononcim për mediat ditën e djeshme. Kujtojmë se vitin e shkuar kanë qenë plot 747 të burgosur, që lanë qelitë duke përfituar nga amnistia e fundvitit. Ndërkohë, momentalisht, sipas statistikave zyrtare të Drejtorisë së Përgjithshme të Burgjeve, vuajnë dënimet në burgjet shqiptare plot 3079 të burgosur. Nga këta, mbi 600 të burgosur kanë 1 ose më pak se një vit të mbetur nga dënimi për të kryer.