Veliaj: Kemi sistemuar Lumin e Tiranës, s’ka më rrezik për përmbytje
Fenomeni i përvitshëm i përmbytjeve në zonën e Bregut të Lumit në kryeqytet do t’i përkasë së shkuarës. Bashkia e Tiranës ka përfunduar ndërtimin e skarpateve dhe pritave në gjatësinë prej 8 kilometrash të lumit, ndërsa ka nisur edhe gjelbërimin dhe pyllëzimin e sipërfaqes anësore të tij. Efektet e kësaj ndërhyrjeje u ndjenë nga ky vit, pasi kjo zonë u shpëtoi përmbytjeve, që përfshinë vendin disa javë më parë. Kryebashkiaku Erion Veliaj inspektoi dje nga afër punimet e realizuara deri më tani dhe mori pjesë në aksionin e mbjelljes së pemëve dhe shkurreve, si pjesë edhe e projektit të “Pyllit Orbital”. “Jo vetëm që s’patëm përmbytje në zonën e Bregut të Lumit, jo vetëm që uji nuk kaloi as brezin e parë të mbrojtjes, por jemi sot në një situatë ku po bëjmë diçka që para dy vitesh konsiderohej luks. Të ndërtonim një park buzë lumit, të mbillnim 4000 pemë, 40 mijë shkurre dekorative, të bënim pistat e vrapit te Bregu i Lumit. Sot kemi përfunduar sistemimin e lumit, lumi është në shtrat, kanalet e ujërave të zeza shkojnë në kolek- torë dhe nuk hidhen më në lumë”, tha Veliaj. Sipas tij, në sajë të këtij investimi është rritur vlera e pronës, ndërsa banorët e saj do të kenë shumë pranë një minipark për çlodhje dhe aktivitete të ndryshme sportive. Gjithashtu, kreu i Bashkisë bëri të ditur se aksioni i mbjelljeve do të vazhdojë edhe në të gjitha ditët e festave të fundvitit, deri në pranverë, për t’u siguruar që brenda këtij sezoni mbjelljesh do të thyhet rekordi i mbjelljeve të vitit të shkuar. “Më vjen mirë që po shfrytëzojmë edhe ditët e fundit të vitit për këtë revolu- cion të gjelbër për Tiranën. Do të vazhdojmë fuqimisht edhe në fillim të vitit të ri me projektin e “Pyllit Orbital”, si në veri, edhe në jug. Ajo që po bëjmë është që po gjelbërojmë segmente të caktuara të “Pyllit Orbital” dhe jam i sigurt se brenda dy mandateve të ardhshme, do të kemi të gjithë konturin e pyllit orbital, tashmë të shënjestruar si një mushkëri oksigjeni për Tiranën”, u shpreh Veliaj. Ai u bëri thirrje banorëve që në këto ditë festash të tregohen të kujdesshëm dhe të ruajnë ambientin pastër.