Bombë në supermarket në Shën Petërburg, plagosen 10 vetë
CIA kishte paralajmëruar se qyteti rus do ishte shënjestër sulmesh
Dhjetë vetë janë shtruar në spital pas plagëve të marra në një shpërthim, në një supermarket në Shën Petërburg të Rusisë, të mërkurën në mbrëmje.
Shpërthimi ndodhi në tregun “Perekrestok” në veriperëndim të qytetit. Nuk pati asnjë të vdekur në incidentin, të cilin autoritetet po e shohin si një sulm të mundshëm terrorist. Shpërthimi u shkaktua nga një bombë e bërë në shtëpi, e mbushur me pjesë metalike, me një forcë të barabartë me 200 gram TNT, sipas hetuesve rusë. Bomba ishte fshehur në një dollap me kyç, ku blerësit lënë gjërat e tyre, në një degë të zinxhirit të supermarketeve “Perekrestok”, sipas raporteve lokale. Deri në mbrëmje vonë, askush nuk e ka marrë përgjegjësinë për shpërthimin në tregun e lagjes “Kalininsky”, në veriperëndim të qytetit. Motivi për këtë ngjarje mbetet i paqartë. Komisioni Hetues në Rusi ka dërguar ekspertë për të hetuar shpërthimin dhe është nisur një çështje penale për tentativë vrasjeje në masë. “Të gjitha versionet e mundshme të asaj që ka ndodhur, janë duke u shqyrtuar. Deri tani është vërtetuar se 10 persona janë dërguar në spital me lëndime”, tha Alexander Klaus, kreu i komisionit hetimor të Shën Petersburg, për “Reuters”. Më shumë se 50 vetë u evakuuan nga supermarketi pas shpërthimit. Ka pasur mijëra njerëz brenda kompleksit ku ndodhej tregu në kohën e incidentit. Zona ishte e tejmbushur për shkak të festimeve të Vitit të Ri. Supermarketi “Perekrestok” ndodhet në katin përdhes të qendrës së “Gigant Hall”, në pjesën veriperëndimore të Shën Petërburgut. Pamjet nga skena shfaqën ambulanca dhe automjete policore jashtë tregut. Janë dëmtuar si strukturë vetëm një mur dhe një arkë në supermarket, gjatë këtij shpërthimi. Viktoria Gordeyeva, një banore e Shën Petërburgut, e cila po ecte pranë supermarketit menjëherë pas shpërthimit, tha se njerëzit kishin frikë të hynin në dyqane të tjera në këtë zonë. Presidenti rus, Vladimir Putin, i ka telefonuar Presidentit të SHBA- ve, Donald Trump disa ditë më parë, për ta falënderuar për një informacion të CIA- s, që ndihmoi në prishjen e një serie bom- bardimesh në Rusi. Të dyshuarit e arrestuar kishin planifikuar të bombardonin katedralen Kazan të Shën Petërburg dhe vende të tjera të mbushura me njerëz. Me sa duket, nuk janë arrestuar të gjithë njerëzit që kishin bërë planifikime për sulmet në këtë qytet.