Meta: Janullatos si De Biazi, pse i shkrova Trumpit për OKB
“Çizmet e Kryemadhit ndaj Ramës? Ngjarje e papranueshme...”
Presidenti i Republikës, Ilir Meta, i ftuar në emisionin “Opinion” të gazetarit Blendi Fevziu në “TV Klan”, ka folur rreth temave të rëndësishme, që nga dekretimi i shtetësisë për Kryepeshkopin Janullatos deri tek vota në OKB që Shqipëria mbajti kundër SHBA- ve.
Meta tha dje se dekretimi i shtetësisë së Anastas Janullatosit erdhi si bindje e tij pasi ai i plotësonte që të gjitha kushtet ligjore për të pasur shtetësinë shqiptare. Ndërkohë që për votën në OKB, Presidenti theksoi se nuk është konsultuar askush me të dhe se vota abstenim do të ishte vendimi i duhur.
Kush jua kërkoi që t’i jepni shtetësinë shqiptare Anastas Janullatosit? Ishte një, po e quaj, një shërbim që i bëtë Greqisë? Ishte një tentativë për të ulur tensionet me këtë vend apo ishte një bindje e juaja që Anastas Janullatosi e meritonte shtetësinë shqiptare?
Absolutisht ishte një bindje e ime e plotë institucionale...
Dhe nga ishte krijuar kjo bindje zoti Meta?
... Për shkak të ligjit për shtetësinë, ku mund të theksoj se Fortlumturia e Tij i plotësonte të gjitha kriteret...
Brenda këtij ligji duhet të jetë edhe fakti, që ai duhet të flasë shqip, në mos gaboj...?
Nuk besoj se trajneri ynë shumë i dashur De Biazi flet shqip apo e flet shumë më mirë shqipen se sa Fortlumturia e Tij, për të mos përmendur edhe mjaft raste të tjera. Së dyti, mendoj që në këtë mënyrë i kam bërë një shërbim shumë të mirë...
Kujt ia keni bërë këtë shërbim?
Kishës Ortodokse Autoqefale të Shqipërisë, të cilën Fortlumturia e Tij dhe në drejtimin e të cilit u ringrit nga hiri, i trashëguar nga sistemi komunist dhe është sot një nga kishat më të nderuara në botë...
Presidenti Berisha, Presidenti Meidani, Presidenti Moisiu, Presidenti Topi, Presidenti Nishani, jeni i gjashti, pra pas pesë presidentëve, të cilët kanë refuzuar që ta bëjnë shtetas shqiptar Anastas Janullatosin. Ju keni vendosur që ta bëni këtë gjë.
Mendoj se nuk ka pasur ndonjë refuzim. Ka pasur mosdekretim. Ka qenë një kërkesë...
Mosdekretim. Unë e konsideroj refuzim këtë gjë.
Ju e konsideroni, unë e kam të vështirë ta konsideroj, sepse kemi raste kur refuzohet një kërkesë për arsye se nuk plotësohet një kusht apo për ndonjë arsye tjetër...
Ishit i bindur kur e firmosët këtë dekret?
Kam qenë shumë i bindur dhe sot jam akoma më i bindur dhe në të ardhmen do të jem edhe më i bindur, sepse më vjen keq, por ne ende vazhdojmë të politizojmë çështjen e besimit...
A kishte një marrëveshje mes jush dhe Janullatosit që ju t’i jepnit shtetësinë dhe ai të deklaronte se pasardhësi i tij do të jetë shqiptar, siç deklaroi?
Nuk ka pasur një marrëveshje të tillë, por unë ua thashë që ai është njeri i besimit. Është një njeri i Perëndisë. Ai është një misionar, i cili jo vetëm që ka një mision që pothuajse e ka realizuar në kuptimin e rindërtimit nga hiri të Kishës Autoqefale Ortodokse të Shqipërisë, por ka edhe një vizion për të ardhmen. Dhe këtë vizion besoj se e shprehu shumë qartë në një nga televizionet kryesore të Greqisë ku u shpreh qartë se pasardhësi i tij në krye të KOASH- it do të jetë shqiptar dhe...
Lidhur me votën në OKB, ministri i Jashtëm është shprehur që ju nuk kuptoni nga politika e jashtme, po manipuloni ose nuk e kuptoni mirë se çfarë ka ndodhur realisht. A jeni konsultuar ju me ministrin e Jashtëm?
Mos prisni nga unë që të ulem në nivele të tilla, të debateve dhe polemikave. Ky ka qenë një vendim që Ministria e Jashtme mund të jetë konsultuar me këdo, por jo me institucionin e Presidentit të Republikës. Ka pasur një përpjekje përpara votimit nga drejtori im i kabinetit, meqenëse çështja po bëhej mjaft sensibël në media dhe po afronte dhe ora e votimit për të ditur se si...
Kryeministri Rama ju kontaktoi për këtë çështje?
Asnjëherë nuk kam menduar personalisht se mund të ndodhte një votim i tillë në një situatë të tillë kur kërkesat kanë qenë publike të bëra dhe nga Presidenti i SHBA- ve, dhe nga ambasadorja e SHBA- ve në OKB.
Ju e dinit shumë mirë, zoti Meta, se ambasadori që përfaqësonte Shqipërinë në Konferencën Islamike, e kishte dënuar Rezolutën. Pra, që ishte një parathënie e asaj që pritej të ndodhte në OKB.
Nuk ka pasur asnjëherë një rekomandim apo një sugjerim, apo udhëzim që ambasadori ynë të dënojë një veprim sovran të SHBA- ve.
A ju kontaktoi Rama për këtë çështje? Qoftë edhe për t’u konsultuar.
Nuk jam konsultuar me askënd. As ministri i Jashtëm? Dhe nuk e kam menduar kurrë që Shqipëria do të votonte në këtë mënyrë, ishte tërësisht e panevojshme.
A keni ju një opinion se përse Shqipëria ka votuar kështu?
Edhe nëse kam, nuk kam asnjë arsye pa pritur sqarime që të jap qëndrimin tim. Por, ajo që mund të them është që ‘ qëndrimet e Shqipërisë për çështje të rëndësishme sidomos në raport me aleatët tanë më të rëndësishëm duhet të jenë mjaft të qëndrueshme, të besueshme dhe të mirëkonsultuara’. Pra, duhet të reflektojnë një konsensus madje jo vetëm shtetëror, por edhe një konsensus më të gjerë për arsye, sepse kemi çështje të rëndësishme siç është ende çështja e Kosovës, çështjet e shqiptarëve në rajon, të cilat na kërkojnë përgjegjshmëri të madhe për të ruajtur besueshmërinë ndërkombëtare.
Vetëm se, zoti Meta, a ju duket gati- gati skandaloze që për një gjë kaq të rëndësishme shteti shqiptar në dy institucione: Presidenca dhe Kryeministria, pra Presidenti dhe Kryeministri, shto dhe ministrin e Jashtëm, pra, që janë politikëbërësit e jashtëm më të rëndësishmit në këtë vend nuk kanë pasur komunikim?
Këtë mund të vlerësoni ju dhe mund ta vlerësojë kushdo. S’e kam menduar asnjëherë se do të ketë një vendim të tillë, sepse ka pasur disa opsione të tjera. Së dyti, pak minuta përpara votimit kur Drejtori i Kabinetit ka dashur të pyesë se si parashikohet votimi, përgjigja ka qenë: “Jemi ende në konsultime”.
Si mund të lexohet në SHBA, kur Presidenti dërgon një letër ku konteston publikisht vendimin e Kryeministrit? A duket një shtet karagjoz ky shtet?
Një shtet serioz i zgjidh këto çështje përpara se të ndodhin veprime të tilla. E vetmja gjë që unë jam dakord me deklaratat që ka bërë ministri i Jashtëm është se Shqipëria është Republikë Parlamentare dhe unë për çdo veprim timin jam i gatshëm të përgjigjem përpara Parlamentit, sepse respektoj Parlamentin dhe vendin tim si një Republikë Parlamentare. Përsa i takon rastit në fjalë, letra ime nuk ka të bëjë thjesht me shqetësimin se vota jonë do t’i sjellë një dëm të madh Amerikës, sepse jam i bindur që nuk i sjell një dëm të madh Amerikës, por ka të bëjë me qartësimin e pozicionit tim si President i Shqipërisë edhe në raport me Amerikën, por s’është kjo kryesore për mua në raport me gjithë qytetarët shqiptarë dhe në raport me të gjithë shqiptarët kudo ku janë, të cilët në tërësi nuk e kanë pritur mirë këtë votim.
Ndërkohë, mos harroni dhe diçka tjetër, zoti Meta, sërish që Shqipëria ishte nën presion nga Bashkimi Europian, i cili e kishte dënuar vendimin e Presidentit Trump. Ne ndodhemi në proces integrimi kur në qershor pritet të vihet në peshore kërkesa jonë për hapjen e negociatave.
Janë shumë vende të BE- së që kanë abstenuar dhe kanë mbajtur qëndrimin e tyre dhe që tre- gon qartë që kjo nuk ka qenë detyruese dhe aq më tepër që këtu nuk kemi të bëjmë thjesht me çështjen e Jerusalemit apo çështjen e mënyrës së zgjidhjes së këtij konflikti. Këtu kemi të bëjmë kryesisht me një vendim sovran të një vendi sovran siç janë SHBA- të.
Sa herë jeni takuar me Kryeministrin Rama qëkur jeni bërë President për të diskutuar për çështje të rëndësishme, vetëm për vetëm? Dhe nëse po, për çfarë keni folur?
Jemi takuar disa herë, edhe vetëm për vetëm. Kemi folur për çështje të ndryshme, por nuk jemi këtu për të treguar histori, këtu jemi për të mbajtur qëndrime për disa çështje shumë të rëndësishme, për të cilat është shumë mirë të ketë konsultim paraprak jo vetëm midis Qeverisë dhe Presidentit, Qeverisë dhe Parlamentit dhe opozitës, por edhe faktorëve të tjerë në mënyrë që gjithmonë të tregojmë qëndrueshmëri dhe seriozitet.
Ndërkohë, çfarë raportesh keni me kreun e opozitës, zotin Basha? A jeni takuar me të?
Marrëdhënie normale. Kur kemi pasur raste, jemi takuar.
Po me zotin Berisha, vazhdoni të keni të njëjtin raport dashurie?
Dihet që është një raport i veçantë. Ka një afeksion, por pavarësisht nga kjo unë jam i hapur në raporte me të gjithë faktorët, me të gjithë aktorët, kryesisht baza institucionale, por edhe në raporte shoqërore.
A e keni takuar Kryeprokuroren e re, zonjën Marku?
Nuk e kam takuar dhe nuk kam pasur ndonjë arsye për të takuar.
Kur flisni për ngjarje të papëlqyeshme, keni parasysh edhe goditjen me çizme që bashkëshortja juaj i bëri Kryeministrit të vendit?
Padyshim. Ju prisni që unë të them që kjo goditje me çizme është biblike, siç thotë Doktori?
Dhe ju biseduat me zonjën Kryemadhi më pas?
Ajo ka bërë zgjedhjen e saj dhe mban vetë përgjegjësi edhe para rregullores së Kuvendit, edhe para ligjeve të vendit, edhe para opinionit publik. I vetmi person, për të cilin unë mbaj përgjegjësi është Era.
Ndërkohë kur keni biseduar me bashkëshorten, çfarë opinioni i keni dhënë ju personalisht, jo si President?
Ne jemi dy tipa të ndryshëm si natyrë dhe këtu nuk është çështja se si mendoj unë si bashkëshort. Për mua si President, ngjarje të tilla janë të papranueshme dhe jam i bindur që vetëm dialogu, vetëm transparenca mund ta çojnë atje ku duhet Reformën në Drejtësi.