Marku takon kreun e SHISH e ambasadoren e Gjermanisë në Tiranë
Prokurorja e Përgjithshme, Arta Marku, pas takimit me ambasadorin amerikan, Donald Lu, është takuar me kreun e propozuar të SHISH, Helidon Bendo. Takimi i Kryeprokurores së re me Bendon vjen në një kohë që ambasada e SHBA i ka kërkuar Markut të hetojë korrupsionin në nivele të larta, duke përfshirë edhe çështjen Tahiri. Pas takimit të zhvilluar me kreun e komanduar të SHISH, Kryeprokurorja Arta Marku u takua me ambasadoren e Gjermanisë në Tiranë, Susanne Schütz. Në këtë takim, diplomatja gjermane mësohet të ketë shprehur mbështetjen e vendit të saj për institucionin e Prokurorisë së Përgjithshme, si edhe vullnetin për forcimin e mëtejshëm të bashkëpunimit dypalësh në fushën e sigurisë dhe të ndjekjes penale. Ndërkohë, që Kryeprokurorja Arta Marku ka shprehur vlerësimin për ndihmesën e madhe që kanë ofruar autoritetet gjermane për Prokurorinë Shqiptare, si në aspektin logjistik, ashtu edhe në koordinimin për hetime të përbashkëta. Sipas njoftimit të bërë publik nga Prokuroria e Përgjithshme, Marku ka garantuar diplomaten gjermane se do të intensifikojë luftën kundër korrupsionit dhe trafiqeve të paligjshme, si edhe do të forcohet më tej bashkëpunimi vendas dhe ndërkombëtar në luftën kundër korrupsionit dhe trafiqeve të paligjshme. Në disa deklarata të njëpasnjëshme, të bëra publike edhe nga ambasadori i SHBA- ve, është deklaruar se duke nisur nga muaji janar i vitit të ardhshëm, në vend do të ketë zhvillime të reja dhe para drejtësisë do të shkojnë “peshq të mëdhenj”.