Naftëtarët vijojnë protestën, ja zgjidhja në Tiranë
Ministrat Gjiknuri dhe Ahmetaj: Rafineria është private
Ministri i Energjetikës, Damian Gjiknuri dhe ministri i Financave, Arben Ahmetaj, zhvilluan dje një takim me punëtorët e Rafinerisë së Naftës së Ballshit dhe Fierit, përfaqësuesve të sindikatave dhe administratorit të kompanisë “Ionian Refining & Trading Company – IRTC SHA”. Takimi u zhvillua pas protestës së naftëtarëve para Ministrisë së Energjetikës, pasi nuk janë paguar nga kompania. Gjatë takimit, punonjësit e rafinerisë së naftës kërkuan pagën për muajin nëntor. Ministrat Gjiknuri dhe Ahmetaj theksuan edhe njëherë faktin se rafineria është tanimë një ndërmarrje në pronësi e përgjegjësi private, e për pasojë është detyrim ligjor dhe kontraktual i punëdhënësit privat të respektojë të gjitha detyrimet sipas legjislacionit në fuqi. Me kërkesë të Sindikatës së Naftëtarëve, në takim u ftua dhe mori pjesë edhe administratori i kompanisë private IRTC, i cili garantoi përfaqësinë e punonjësve se brenda ditës së nesërme ( sot) do të paguajë pagën e plotë të muajit nëntor. Naftëtarët parashtruan edhe 3 kërkesa të tjera, përfitimin e statusit, krijimin e infrastrukturës shëndetësore për trajtimin e sëmundjeve profesionale në Qarkun e Fierit dhe gjetjen e një zgjidhjeje të qëndrueshme dhe afatgjatë ekonomike për të ardhmen e rafinerisë. Në lidhje me statusin e “Naftëtarit”, përfaqësia e punonjësve të Rafiner- isë së Naftës në Ballsh do të punojë ngushtësisht me grupin e punës të ngritur nga Ministria e Infrastrukturës dhe Energjisë për të përmbyllur në një kohë sa më të shpejtë aplikimet ligjore për përfitimin e statusit. Sa i për- ket të ardhmes së kësaj rafinerie dhe sektorit të përpunimit të naftës në përgjithësi, ministrat Gjiknuri dhe Ahmetaj i bënë edhe një herë me dije përfaqësisë së punonjësve se rafineria është në pronësi private, por institucionet shtetërore do të shohin mundësinë e thithjes së investitorëve seriozë në sektorin e përpunimit, në mënyrë që kjo industri të ketë një zhvillim të qëndrueshëm dhe afatgjatë. Në të njëjtën kohë, kërkesës së punonjësve për ngritjen e një pavioni të specializuar për sëmundjet profesionale të naftës në Spitalin e Fierit, ministrat Gjiknuri dhe Ahmetaj iu përgjigjën me garancinë se plani i investimeve në sektorin e shëndetësisë në Qarkun e Fierit do të marrë edhe këtë prioritet.