Mjekësia në zi, ndahen nga jeta mjekët Sallaku e Runa
Agim Sallaku e Arben Runa s’arritën ta fitonin betejën me sëmundjen
“Fituan beteja të panumërta me sëmundjet për pacientët e tyre, por nuk arritën të fitojnë të fundit betejë të tyre”.
Ishin këto të paktat fjalë që shoqëruan lajmin e hidhur për ndarjen nga jeta të dy mjekëve, që i dedikuan jetën bluzës së bardhë. Shefi i shërbimit të Onkologjisë, prof. Agim Sallaku dhe doktor Arben Runa, kirurg tramatolog në Spitalin Ushtarak, ndërruan jetë dje duke lënë pas shumë dhimbje, jo vetëm te familjarët e të afërmit, por te të gjithë ata që patën fatin t’i njohin nga afër. Prej kohësh, profesor Sallaku vuante nga një sëmundje e rëndë dhe trajtohej në një klinikë të specializuar në Turqi, aty ku ndërroi edhe jetë. Dy muaj më parë, ai mundi të kthehej në Tiranë dhe kur të gjithë mendonin se e kishte mposhtur sëmundjen, vjen lajmi se sëmundja kishte mposhtur atë. “Me profesor Sallakun, më mbetet kujtimi i një bashkëpunimi të shkëlqyer, që pata gjatë katër viteve që drejtova Qendrën Spitalore Universitare “Nënë Tereza”. Më 19 nëntor mora prej tij mesazhin - që fatkeqësisht do të ishte edhe i fundit - për projektin e fuqizimit të radioterapisë në Spitalin Onkologjik. Më shkruante: “Filloi instalimi i akseleratorit të dytë. Jam i lumtur!”. Është ky një pjesë nga mesazhi i ngushëllimit që ministrja e Shëndetësisë dhe Mbrojtjes Sociale, Ogerta Manastirliu, ka ndarë në rrjetet sociale si homazh pas lajmit për ndarjen nga jeta të profesor Sallakut. Po si pasojë e një sëmundjeje të rëndë, të diag- nostikuar gati dy vite më parë, ka ndërruar jetë dje, edhe doktor Arben Runa, i cili shërbeu deri ditën e fundit në spital. Për ministren Manastirliu, humbja e dy mjekëve është një humbje e pazëvendësueshme. “Lajmi i ndarjes së parakohshme nga jeta, të dy personaliteteve të mjekësisë shqiptare, profesor Sallakut dhe doktor Runës, është fort i hidhur. Sot, familjet kanë humbur të dashurit e tyre, ndërsa mjekësia shqiptare dhe shoqëria jonë ka humbur dy personalitete, mjekë të pazëvendësueshëm, puna e të cilëve, jam e sigurt se do të çohet përpara nga kolegët dhe studentët e tyre, që me aq pasion i kanë mbështetur dhe përgatitur. U shpreh ngushëllimet më të sinqerta familjeve të profesor Sallakut dhe doktor Runës dhe jam pranë tyre në këto momente të vështira të humbjes së njeriut të dashur”, përfundon mesazhi i ngushëllimit i min- istres së Shëndetësisë, Manastirliu. Të shumtë ishin po ashtu mesazhet, nga kolegët dhe të gjithë ata që patën fatin t’i njohin nga afër.
AGIM SALLAKU Profesor Agim Sallaku lindi në Tiranë, në vitin 1956. Është diplomuar në Fakultetin e Mjekësisë, si mjek i përgjithshëm, në vitin 1981. Me rastin e 100- vjetorit të Pavarësisë, ai u dekorua me Certifikatën e Mirënjohjes nga Ministria e Shëndetësisë dhe si një ndër figurat më aktive në fushën e onkologjisë shqiptare.
ARBEN RUNA Doktor Arben Runa lindi në 1960 dhe u diplomua për kirurg traumatolog. Ai shërbeu deri në fund të jetës së tij, si kirurg pranë Spitalit Ushtarak në kryeqytet. Runa kishte po ashtu, pasion letërsinë dhe është autor i disa cikleve të arrira poetike, tregimeve dhe reportazheve, botuar në vitet ’ 90.