Masakrojnë të riun me dru dhe sëpatë, pranga tre kushërinjve
KORÇË – Dhunuan me sëpatë të riun, arrestohen tre kushërinjtë. Tre të rinjtë nga Pogradeci janë arrestuar nga Policia pasi kanë rrahur për vdekje një 27- vjeçar. Policia bën të ditur se, ka prangosur në flagrancë tre autorët e dyshuar të ngjarjes së ndodhur dy ditë më parë në fshatin Podgorie. Eduart Xhemollari, 25 vjeç, Jani Xhemollari, 48 vjeç dhe Marenglen Bollguri, 27 vjeç, ( kushërinj mes tyre) të tre banues në fshatin PodgorieMaliq, akuzohen për veprën penale “Vrasja me dashje, mbetur në tentativë e kryer në bashkëpunim”. Kjo pasi, gjatë ditës së mërkurë, të tre këta persona në bashkëpunim mes tyre, për motive të dobëta kanë tentuar të vrasin me mjete të forta, shtetasin E. B, 27 vjeç, banues në Podgorie, i cili është transportuar në Spitalin e Korçës për ndihmë mjekësore ku ndodhet nën kujdesin e mjekëve. Ngjarja ka ardhur pasi një prej kushërinjve kishte pasur një konflikt verbal me 27- vjeçarin e dhunuar pak kohë më parë. Për këtë arsye, tre kushërinjtë janë hakmarrë duke ushtruar dhunë barbare mbi të riun. Mësohet se tre të arrestuarit kanë përdorur dru, gurë dhe sëpatë duke e lënë të masakruar 27vjeçarin E. B. Pas ndërhyrjes së bashkëfshatarëve dhe njoftimin e Policisë për ngjarjen, specialistët e Seksionit kundër Krimeve ndaj personit, bënë kapjen dhe arrestimin në flagrancë të tre të akuzuarve. Çështja në ngarkim të tre kushërinjve i ka kaluar Prokurorisë të Rrethit Gjyqësor Korçë për veprime të mëtejshme hetimore për veprën penale “Vrasja me dashje, mbetur në tentativë e kryer në bashkëpunim”. dh. ç