Presidenti italian shpërbën Parlamentin, votim më 4 mars
Sondazhet tregojnë Lëvizjen Pesë Yjet si forcë të parë politike
Presidenti italian, Sergio Mattarella, shpërndau Parlamentin të enjten duke e çuar vendin drejt zgjedhjeve kombëtare më 4 mars. Rezultati mund të jetë një parlament i varur ( pa fitues) dhe një periudhë e turbullt politike.
Kreu i shtetit në Itali nënshkroi një dekret duke i dhënë fund sesioneve legjislative në të dyja dhomat e Parlamentit, sipas një deklarate me e- mail nga zyra e Mattarellas. Në një takim më vonë, qeveria e Kryeministrit Paolo Gentiloni caktoi datën e zgjedhjeve. Të enjten, Gentiloni e hodhi poshtë rrezikun e turbullirave politike në Itali. “Ne nuk duhet të dramatizojmë çështjen e paqëndrueshmërisë politike, e cila sigurisht që është një çështje, por më tepër sesa të shqetësohemi për këtë, duhet ta trajtojmë me bindjen se jemi shumë të vaksinuar ndaj saj”, tha Gentiloni. Ndryshimi i shpeshtë i qeverisë, sipas tij, nuk është një fenomen i kohëve të fundit dhe nuk e ka ndalur rritjen e Italisë. Italia, e cila ka ekonominë e tretë më të madhe në eurozonë, rrezikon një parlament të varur pas votimit. Sondazhet e opinionit tregojnë se lëvizja anti- BE, Pesë Yjet, e cila kërkon një referendum për braktisjen e euros nëse traktatet e Bashkimit Europian nuk rinegocionohen, udhëheq ndaj Partisë Demokratike të Gentilonit dhe grupet në një koalicion të mundshëm të qendrës së djathtë, që do të përfshinte “Forza Italia” të ish- Kryeministrit Silvio Berlusconi. Por as Pesë Yjet, as demokratët e kryesuar nga ish- Kryeministri Matteo Renzi, dhe as blloku i qendrës së djathtë, nuk do të fitonin shumicën parlamentare, sipas sondazheve. Po sipas rezultateve të këtyre sondazheve, një koalicion i madh i mundshëm mes Demokratëve dhe “Forza Italia”, nuk do ta kishte shumicën. Lëvizja Pesë Yjet dëshiron që Presidenti Mattarella, detyra e të cilit është të emërojë një kryeministër, t’i japë atyre një mandat për të formuar një qeveri, e cila do të ishte e 65- ta e Italisë që nga Lufta e Dytë Botërore. Kjo, gjithnjë nëse vërtetohen parashikimet e sondazheve që kjo lëvizje politike do të marrë më shumë vota sesa partitë e tjera në Itali. Megjithatë, Lëvizja Pesë Yjet e ka përjashtuar krijimin e një koalicioni, duke thënë se në vend të tij, do të kërkonte mbështetje të jashtme për politikat e saj nga të gjitha forcat politike. Presidenti Mattarella nuk ka asnjë detyrim t’i japë një mandat udhëheqësit të partisë që del në krye, sipas deklaratës së një zyrtari shtetëror për “Bloomberg”, i cili nuk pranoi të emërtohej. Presidenti, së pari, mund të kërkojë të përcaktojë nëse partitë mund të bien dakord për një koalicion me vende të mjaftueshme për të qeverisur.