Patozi takohet me Bashën, kreu i PD: Zërat e lirë, e vetmja shpresë
“Një nga qëllimet e regjimit të sotëm: T’i shkurajojë njerëzit”
Përvjetori i 27- të i gazetës “Rilindja Demokratike”, njëkohësisht organi zyrtar në shtyp i Partisë Demokratike, mblodhi bashkë ish- drejtues dhe kontribuues ndër vite në këtë media. Ftesave të shpërndara me firmën e kreut të PD- së, Lulzim Basha, iu përgjigjën drejtuesit e partive kryesore në opozitë, Monika Kryemadhi, Fatmir Mediu, Nard Ndoka, Dashamir Shehi, Agron Duka etj..
Në ceremoni merrte pjesë edhe ish- Kryeministri Sali Berisha, ish- Presidenti Bujar Nishani, funksionarë të lartë të Partisë Demokratike dhe drejtues t ë medias. Në mesazhin e dhënë në përvjetorin e Rilindjes së Partisë Demokratike, Basha apeloi që 5 janari të shihet si një ditë e reflektimit për misionin e medias dhe të gjithë intelektualëve të fjalës. “Kjo ditë duhet të jetë edhe ditë e reflektimit për misionin e medias dhe të gjithë intelektualëve të fjalës. Liria, demokracia dhe mirëqeverisja nuk mund të ekzistojnë pa fjalën e lirë dhe pa median e lirë. Liria nuk mund të ruhet dot nëse njerëzve u mungon dija, informacioni. Vetëm një popull i mirëinformuar është në gjendje të vetëqeveriset dhe të ruajë demokracinë. Një nga qëllimet kryesore të regjimit të sotëm: t’i shkurajojë njerëzit, t’i bëjë pesimistë, t’i bëjë të mos besojnë në asgjë, të mos besojnë tek demokracia, të mos besojnë tek liria, të mos besojnë tek aftësia e tyre për t’u qeverisur, të mos besojnë se mund të ketë ndonjëherë politikë të mirë. Sepse në mosbesim dhe dëshpërim sundohet më lehtë”, tha Basha. Kreu i PD- së theksoi se për të gjitha kontributet e dhëna për lirinë, RD do të ketë përherë një vend të veçantë në historinë e Shqipërisë. Basha shprehu mirënjohje për themeluesit dhe drejtuesit ndër vite të RD- së, mes të cilëve përmendi edhe kreun e LIBRA- s, Ben Blushi dhe ish- nënkryetarin e PD- së dhe një nga zërat më kritikë kundër tij, Astrit Patozin. “Në regjimet autokratike, kur pushteti përqendrohet në një dorë, media merr një rëndësi të jashtëzakonshme. Por, kur edhe media është e kapur, zërat e lirë janë e vetmja shpresë për t’u kthyer tek liria. Rilindja Demokratike erdhi në jetë së bashku me pluralizmin politik dhe me lirinë e mendimit dhe të shprehjes. Askush tjetër nuk luftoi më shumë dhe më mirë gënjeshtrën, manipulimin, propagandën komuniste. Ne do t’u jemi përherë mirënjohës të gjithë atyre që me kurajë dhe vendosmëri e sollën RD- në në jetë në kushtet e vështira të dhunës, kërcënimeve dhe terrorit shtetëror: Preç Zogaj, Frrok Çupi, Mitro Çela, Blendi Fevziu, Armand Shkullaku, Ben Blushi, Dritan Kaba dhe Edi Paloka kanë qenë studentë, që punuan fillimisht vullnetarisht që në numrat e parë. Në këtë përvjetor, dua të përgëzoj të gjithë gazetarët dhe drejtuesit e RDsë në vite, të cilët kanë dhënë një kontribut të jashtëzakonshëm në aktivitetin e saj, por edhe për Shqipërinë. Kryeredaktorët dhe drejtuesit: Frrok Çupi, Mitro Çela, Bashkim Trenova, Napolon Roshi, Lorenc Ligori, Xhevat Mustafa, Astrit Patozi”, theksoi kreu i PD.