SHBA mbështet KQZ, Marku: Deputetëtfshehënemrat e rremë
Ambasada e SHBA: Provë pozitive se dekriminalizimi vazhdon
Ambasadori amerikan në Tiranë, Donald Lu, ka vlerësuar vendimin e Komisionit Qendror të Zgjedhjeve për heqjen e mandatit të dy deputetëve, Aqif Rakipit të PDIU- së dhe Gledjon Rehovicës së LSI- së.
Në një reagim të shkurtër për mediat, Ambasada Amerikane e ka quajtur si pozitiv vendimin e Komisionit Qendror të Zgjedhjeve dhe si një provë për zbatimin e procesit të dekriminalizimit. Në qëndrimin zyrtar të Ambasadës Amerikane theksohet se procesi i dekriminalizimit, i nisur që në vitin 2015, ka filluar të zbatohet dhe do të vazhdojë në Shqipëri. “Ambasada e SHBA mirëpret vendimin e sotëm ( djeshëm) nga Komisioni Qendror i Zgjedhjeve për t’iu hequr mandatet Aqif Rakipit dhe Gledjon Rehovicës. Ky vendim është provë pozitive se procesi i rëndësishëm i dekriminalizimit, filluar në dhjetor 2015, vazhdon në Shqipëri”, thekson njoftimi zyrtar i Ambasadës së SHBA.
PRAPASKENAT Për rastin e dy deputetëve, për të cilët Prokuroria e Përgjithshme kërkoi më 26 dhjetor të vitit 2017 heqjen e mandateve, vetë ambasadori i SHBA- ve në Tiranë, Donald Lu, ka zhvilluar një takim informal me tre përfaqësuesit e partive politike në Shqipëri. Në takimet e veçanta, Lu mësohet të këtë kërkuar nga drejtuesit e partive kryesore, që të zbatojnë ligjin e dekriminalizimit, duke pranuar kërkesën e Prokurorisë. Vendim, që u materializua sot me votimin në një zë të përfaqësuesve të Partisë Demokratike dhe Partisë Socialiste në KQZ. Ndërkohë që Kryeprokurorja e re, Arta Marku, ka konfirmuar me një shkresë të drejtuar dje ndaj KQZ- së, se urdhrat e firmosur nga prokurorja Rovena Gashi janë bërë me dijeninë e saj. Prokuroria është vënë në lëvizje për mandatin e dy deputetëve, një javë pasi Arta Marku mori detyrën e Prokurores së Përgjithshme të përkohshme. Në letrën drejtuar KQZ- së, ajo ka saktësuar se për dy deputetët janë arritur konkluzionet se kanë fshehur dënimet jashtë vendit. “Nga dokumentacioni i përcjellë konkludohet se, me rastin e marrjes së gjurmëve të gishtave, subjektet, minimalisht, janë shoqëruar në organet ligjzbatuese italiane, duke përdorur me këtë rast identitetin e rremë. Pra, konkludohet se subjektet kanë përdorur pranë institucionit zyrtar, gjeneralitete të tjera, të ndryshime nga gjeneralitetet e deklaruara dhe nuk kanë pasqyruar këtë fakt në formularin e vetëdeklarimit në pikën ‘ të dhëna personale’, shkronja b. ‘ Gjeneralitete të mëparshme’”, thekson letra e Kryeprokurores Arta Marku. Më tej, në letrën e firmosur nga Kryeprokurorja e re, për të sqaruar anëtarët e KQZ- së, të cilët kërkuan prova shtesë, thuhet se: “Rezulton se subjektet nuk kanë deklaruar informacione që lidhen me hetimet në ngarkim të tyre, pavarësisht detyrimit ligjor, që buron nga pyetja 3 e formularit të vetëdeklarimit: A keni qenë ndonjëherë në hetim apo gjykim nga një autoritet i huaj për kryerjen e një vepre penale? Duke mos pasqyruar faktet e mësipërme në formular, konkludohet se veprimi i tyre bie ndesh në fushën e zbatimit të pikës 3/ ç, të Kreut III, vendimit nr. 17/ 2016 të Kuvendit”, thekon letra e Kryeprokurores.