Gomonia tentoi të merrte drogë, nuk i bindet Policisë për të ndaluar
VLORE- Delta Forcë, Policia Kufitare dhe Policia e Vlorës janë vënë në ndjekje dje të një mjeti lundrues, por që ka arritur të dalë nga ujërat e territorit tonë. Gjatë kontrollit nga deti dhe toka, në zonën e Karaburunit, nisur nga informacionet e marra në rrugë operative se mund të ishte fshehur lëndë narkotike me qëllim trafikimi, rreth orës 13: 50, Policia ka konstatuar një mjet lundrues, që lëvizte me shpejtësi në drejtim të Mezo- kanalit, Sazan. “Menjëherë, në ndjekje të mjetit lundrues janë vënë 3 mjete lundruese të Policisë Kufitare dhe të Delta Forcë. Është kërkuar ndihma e anijes “Oriku” dhe e helikopterit të FA- së. Gjithashtu, është njoftuar GdF Durrës e Vlorë si dhe homologët italianë. Është ngritur në fluturim një helikopter “COUGAR” i FA- së, i cili ka ndjekur në ujërat neutrale, për rreth 1 orë, gomonen që lëvizte me shpejtësi duke bërë manovra në det me qëllim t’i shmangej ndjekjes së helikopterit”, thuhej në njoftimin e Policisë. Sipas të dhënave, nga deti vijonte ndjekja nga anija “Oriku” dhe tre mjete lundruese të Policisë Kufitare dhe Delta Forcë. Në veprim është futur menjëherë edhe GdF- ja në Shqipëri e Itali. Deri në orët e vona mbrëmë nuk ishte bërë e mundur kapja e gomones, pasi dyshohet se është fshehur në ndonjë gji bregdetar, në ujërat territoriale midis Malit të Zi dhe Kroacisë, por vijon kërkimi nga ajri, nga GdF. Gjithashtu, është vënë në ndjekje edhe Policia malazeze. Nga pamjet filmike të realizuara nga helikopteri i FA- së në bordin e gomones u dalluan tre persona dhe disa bidonë plastikë, ndërsa pjesa tjetër e bordit ishte bosh. Dyshohet se gomonia do merrte lëndën narkotike në Sazan, me qëllim trafikimin në drejtim të Italisë. Nga krehja e zonës në gadishullin e Karaburunit, në vendin e quajtur “Bristan”, midis shkëmbinjve, Policia ka gjetur dhe sekuestruar në cilësinë e provës materiale 28 kilogramë lëndë narkotike, të ndarë në 5 pako. Policia Kufitare, Delta Forcë dhe Drejtoria Vendore e Policisë Vlorë po vijojnë kontrollet në zonë.