Nuk morën certifikatën e sigurisë, pritet transferimi i 60 policëve
Të paktën 60 punonjës të Policisë së Shtetit nuk janë konsideruar të “aftë” për t’u pajisur me certifikatë sigurie, e për rrjedhojë, nuk mund të vazhdojnë karrierën në pozicionet, që kanë pasur. Ata rezultuan të mos e kenë kaluar me sukses provën e besimit për informacionet e klasifikuara. Bëhet fjalë për efektivë me grada të niveleve zbatuese, të mesme dhe të larta, që u janë refuzuar certifikatat e sigurisë nga Drejtoria e Sigurimit të Informacionit të Klasifikuar dhe strukturat përkatëse në Policinë e Shtetit. Burimet thanë se arsyet kanë qenë nga më të ndryshmet, që nga incidentet, që ata kanë pasur në radhët e Policisë, probleme të vërejtura gjatë hetimit të dosjeve të ndryshme, vërejtje të dhëna nga eprorët e deri te probleme të mundshme me deklarimin e pasurisë. Pajisja me certifikatë sigurie pritet të jetë një element i rëndësishëm në përcaktimin e karrierës së shumë prej efektivëve, që duhet të vijojnë karrierën në nivele të larta. Po ashtu, certifikata e sigurisë është kategorikisht e nevojshme për ata oficerë që duhet të kenë akses për informacione të rëndësishme, që kanë të bëjnë me krimin e organizuar, antiterrorin dhe krimet e rënda. Emrat e efektivëve dhe oficerëve, që u është refuzuar certifikimi i sigurisë nuk bëhen të ditur, por mësohet se shumë shpejt ata pritet të lënë detyrat e rëndësishme, që mbajnë nëse kanë të bëjnë me informacione sekrete të rëndësishme, që konsiderohen të klasifikuara. Burimet thanë se këta oficerë dhe efektivë nuk do të përjashtohen nga Policia, por pritet të emërohen në strukturat e rendit, apo struktura në të cilat nuk është e nevojshme pajisja me certifikatë sigurie. Shume shpejt, të gjithë efektivët dhe drejtuesit e policisë do t’i nënshtrohen edhe vetingut. Disa muaj më parë ishin edhe 20 efektivë e oficerë të tjerë të Policisë që u transferuan në detyra dytësore, për shkak se nuk arritën të pajiseshin me certifikatë sigurie. I pyetur në lidhje me këtë fakt, gjatë një prononcimi për gazetarët, ministri i Brendshëm, Fatmir Xhafaj, e konsideroi si një procedurë normale transferimin e atyre që nuk mund të konsiderohet të besueshëm për ruajtjen e informacionit të klasifikuar.