Basha: Do t'i kthejmë qytetarëve paratë e vjedhura nga qeveria
"Qeveria në panik, ndaj po e pengon Reformën në Drejtësi"
Kryetari i opozitës, Lulzim Basha, nga qyteti i Fierit i ka bërë thirrje qytetarëve që të bëhen bashkë për të mbushur sheshet e protestave popullore kundër qeverisë Rama.
Në ceremoninë e 27- vjetorit të themelimit të Partisë Demokratike në Fier, Basha tha se qytetarët duhet t'i japin fund qeverisjes nëpërmjet krimit, e cila sipas tij ka si simbol Saimir Tahirin. Basha theksoi se PD do t'i kthejë shqiptarëve paratë e vjedhura nga ata që i quajti klika kriminale në pushtet, dhe të në njëjtën kohë është zotuar se do i kthej shpresën shqiptarëve. "A jemi gati t'i rikthejmë qytetarëve shqiptarë jo vetëm paratë e vjedhura nga kjo klikë kriminale dhe korruptive, por edhe shpresën se e nesërmja duhet dhe do të jetë demokratike, e lirë dhe europiane siç e dëshiron çdo shqiptar? Jam i bindur që po! Ju bëj thirrje ta mbledhim gjithë këtë energji pozitive dhe ta derdhim në sheshet e protestës popullore. Liri, demokraci!", tha Basha.
KORRUPSIONI
Në Fier, Basha bëri kontrastin mes Saimir Tahirit, i akuzuar për trafik ndërkombëtar droge dhe 22- vjeçarit Estref Halili, që u burgos për një cigare hashash dhe vari veten në burg një vit më parë. "Sot, e gjithë qeveria është ngritur në këmbë për të mbrojtur Sajmir Tahirin, por askush nga ata nuk u kujtua të thotë një fjalë për Estref Halilin 22- vjeçar. Ky është shteti i Edi Ramës. Estref Halili, për një cigare hashash u plas në burg. 22- vjeçarit iu ndërpre jeta në lulen e rinisë. Ndërsa, për Sajmir Tahirin dhe fatin e tij, Edi Rama bëhet gjyqtar, bëhet prokuror, vetëm e vetëm që ta shpëtojë nga drejtësia", tha ai. Lulzim Basha renditi disa fakte pse Partia Demokratike kishte të drejtë, kur paralajmëroi se Edi Rama po kap drejtësinë nëpërmjet Kryeprokurorit. "Menjëherë pas vetëemërimit si kryeprokuror Edi Ramës, Saimir Tahirit iu kthye pasaporta për të udhëtuar jashtë shtetit. Dhe ditë më vonë, Orest Sota, në makinën e të cilit u kapën 860 mijë euro dhe patentat e lundrimit të Sajmir Tahirit, u la i lirë. Sepse Edi Rama e do me çdo kusht kryeprokurorin, për të mbyllur dosjet e krimit dhe të korrupsionit, sepse këto dosje janë fundi i tij dhe i qeverisë së tij, të zhytur në krim dhe të kapur nga krimi." u shpreh Basha. Kreu i PD- së, theksoi se emërimi i Kryeprokurorit pa veting, është prova më e qartë se Edi Rama ka frikë nga Reforma e vërtetë në Drejtësi. "Vetingu, e mbani mend, sa herë i kërkonim llogari Edi Ramës. Ku e ke shëndetësinë falas, thoshte vetingu. Ku i ke 300 mijë vendet e punës, thoshte vetingu. Shqipëria e mbushur me drogë dhe krim, vetingu. Akuzonte nga mëngjesi deri në darkë opozitën, se po bllokonte vetingun. Po sot? Përse e ka zgjedhur Kryeprokurorin pa veting? Përse e ka bllokuar ngritjen e SPAK- ut dhe BKH. Përgjigjja është e thjeshtë dhe e qartë. Sepse Edi Rama dhe bashkëpunëtorët e tij të ngushtë janë në panik dhe të tmerruar. Ata e kanë jetike pengimin e drejtësisë së vërtetë, pengimin e Reformës në Drejtësi", u shpreh kreu i opozitës.