Vasili: Reforma në Drejtësi u miratua falë LSI
"Reformën e minoi me zgjedhjen e Prokurores me 69 vota"
Kryetari i Grupit të LSI- së, Petrit Vasili, e ka quajtur si mashtrues Kryeministrin Edi Rama, i cili tha se LSI është pozicionuar në kampin e të tremburve nga Reforma në Drejtësi. Por Vasili ka kujtuar se LSI ka qenë ndër forcat kryesore që ka negociuar me palët që ndryshimet kushtetuese të miratoheshin me konsensus. "Duke ditur që ky është dhe mashtrues, por edhe i paditur, ky ka pasur vetëm një qëllim për Reformën në Drejtësi, u ka thënë, më ndihmoni si ta kap, si ta rrëmbej që të kem mundësi ti bëj presion kundërshtarëve. Por jashtë kësaj, po vij te Reforma. Reforma në Drejtësi kishte nevojë për një konsensus të madh, sepse ishte reformë e gjithë shqiptarëve. Këtë reformë me 140 vota, siç e dini publikisht dhe në mënyrë të qartë për gjithë shqiptarët, u realizua falë këmbënguljes së drejtpërdrejtë të LSI dhe në mënyrë të veçantë të Ilir Metës, si kryetar i LSI, në atë kohë", ka thënë dje Vasili. Kreu i grupit të LSI- së akuzoi Ramën se ai vrau Reformën në Drejtësi, duke zgjedhur Kryeprokurorin me 69 vota dhe në mënyrë të njëanshme. "Reformën në Drejtësi e minoi me zgjedhjen e Prokurores me 69 vota që ishte antireforma më e thellë dhe ishte vdekje e Reformës në Drejtësi. Po ua them prapë, ai që e vdiq Reformën në Drejtësi është Edi Rama. A do pranohet autorësia për vdekjen e reformës, do pranohet në shqip apo do pranohet në anglisht, nuk ka asnjë rëndësi në dy gjuhët. I cili përkundër asaj që reforma përcakton, ka përcaktu- ar reformën e kapjes në drejtësi. Qëndresa jonë do jetë e papajtueshme, pa asnjë kompromis, pasi këtu nuk ka të bëjë me një çështje që lidhet me opozitën, por me shqiptarët. Ndaj, fronti ynë është një front ndaj mashtrimit, të keqes, krimit dhe ndaj kapjes së shtetit. Këto gjëra janë tepër të qarta, kun- drejt këtyre fakteve nuk ka alternative, se këto janë fakte të gjithë qytetarëve dhe në dritën e diellit", ka thënë dje Vasili. Ai komentoi dhe deklaratat e Kryeministrit se partitë e opozitës votuan Reformën, se i kishin këmbët në një këpucë. Por për Vasilin, Kryeministri ishte ai që nuk e donte Reformën në Drejtësi. "Nuk bëj asnjë koment për çdo lloj idiotësie, që Kryeministri thotë. I vetmi njëri që ka pasur këmbët në një këpucë, për shkak të përfshirjes së tij në botën kriminale dhe në botën e trafiqeve të drogës, tanimë ju jeni përfaqësues të rëndësishëm të medias shqiptare. Ky nuk është domen vetëm i medias tuaj, por edhe i medias botërore të niveleve më të larta. Pra njeriu, që ka pasur këmbët në një këpucë dhe që nuk e donte Reformën në Drejtësi se kjo e fundit e godet atë, nuk na godet ne. Nuk kemi lidhje me trafiqet, ne i kemi goditur trafiqet. Ne nuk kemi mbështetur që Shqipëria të kanabizohet dhe të jetë vend kryq i trafikut të drogave. Miratuam me votat tona. Me votat e LSI- së është votuar vetingu. Dhe Ligji për Prokurorinë, ai ligj që u shkel për prokurorinë dhe i gjithë korpusi i ligjeve të tjera, i miratuam dhe kërkuam të miratohej dhe ne dhamë votat", ka thënë ai.