Rama: Kushti ynë për rikandidim të kryetarëve të bashkive
Kryeministri Edi Rama foli dje me tone të prera për kryebashkiakët, duke zbuluar kështu kushtin kryesor për kandidaturat e PS- së në zgjedhjet e ardhshme vendore, ose për gjithë ata që aspirojnë një mandat të dytë në krye të bashkive. “Kush do bëjë politikë personale për politikën e ujit, nuk do të jetë kandidat i PS në zgjedhjet e ardhshme dhe një kriter themelor për kandidaturat do të jetë suksesi në reformën e ujit i kryetarëve të bashkive”, tha Rama. Rama ka paralajmëruar se nuk do të tolerohet asnjë lojë me dy porta. “Lojë të vjetër me dy porta që nga një anë qeveria kërkon të implementojë një reformë dhe bashkia luan duke shkelur syrin, hë, se s’ka problem le të vjedhin çik se duhen për vota, nuk pranojmë, me forcë nuk i imponohemi askujt, por vendosja në binarët e ligjshmërisë në raport me ujin do te jenë kriteri i parë për të dhënë mbështetje për rikonfirmimin e atyre që duan të marrin një mandat të dytë”- tha Rama. Ndërsa sekretari i Përgjithshëm i PS, Taulant Balla, tha se kryetarët aktualë të bashkive do të testohen nga qytetarët. “Në pranverë do të ketë anketime për performancën e të zgjedhurve në krye të bashkive, asnjë mbështetje politike nuk do të ketë për ta, nëse aleati ynë i vetëm qytetarët nuk do të japin dakordësinë për kandidaturat. Në zgjedhjet vendore ne hyjmë vetëm me një koalicion, atë me qytetarët, përballë kemi ata që e duan politikën armë për të ruajtur privilegjet dhe që opozitën e duan çadër për t’u mbrojtur nga drejtësia”, tha Balla.