Shtetësia e Janullatos, Meta merr vlerësime dhe nga Korça
Presidentit i dhurohet nga Kisha një ikonë e "Shën Ilirit"
Presidenti Ilir Meta ishte dje në qytetin e Korçës, me rastin e festës së shenjtë të "Ujit të bekuar". Gjatë vizitës së tij, Meta është shoqëruar nga Kryegjyshi Botëror i Bektashinjve, Edmond Brahimaj.
Presidenti është pritur në Mitropolinë e Korçës nga Im Zot Johan Pelushi, i cili e ka falënderuar Metën për dhënien e shtetësisë shqiptare për kryepeshkopin Anastas Janullatos. "Falënderojmë Presidentin Meta për dhënien e shtetësisë shqiptare Anastas Janullatos. Falënderime dhe mirënjohje Presidentit Meta në emër të të gjithë besimtarëve ortodoksë të Korçës", ka thënë Im Zot Pelushi. Në shenjë mirënjohje, Presidentit iu dhurua nga Mitropoliti i Korçës një ikonë e posaçme e Shën Ilirit. Kjo ikonë e Shën Ilirit ka origjine ilire, shenjt i besimtarëve të krishterë ortodoksë.
VIZITA
Gjatë vizitës, Presidenti Meta u ndal fillimisht në Katedralen "Ngjallja e Krishtit" duke marrë pjesë në ceremoninë e hedhjes së kryqit të shenjtë dhe festimin e ditës së "Ujit të Bekuar" në Korçë. Me këtë rast, Presidenti duke vënë në dukje se sa vështirë është të gjesh një ditë kaq të bukur edhe me dëborë, edhe me diell, u shpreh para përfaqësuesve të mediave: "Pata një kënaqësi të veçantë që këtë festë të bukur të ditës së ' Ujit të Bekuar' ta përjetoja sot në qytetin e mrekullueshëm të Korçës duke ju uruar edhe njëherë të gjithëve jo vetëm gëzuar këtë festë, por njëkohësisht edhe një vit sa më të mbarë për të gjithë korçarët, për të gjithë shqiptarët!" Meta ishte dhe vizitoi edhe Pazarin e Korçës, ku zhvilloi një takim të veçantë me pjesëtarët e grupit të famshëm artistik "Lira", me të cilët bashkëbisedoi ngrohtësisht duke ndarë vlerësimet për vlerat e jashtëzakonshme qytetare, artistike dhe kulturore të Korçës dhe korçarëve.