Zbardhen ndryshimet në kupolën e PS, Rama e Basha përplasen për vetingun dhe integrimin
Ftesa vetëm për PD: Nuk jemi këtu për të përdorur negociatat që opozita të mos bëjë protesta, por të sillen me dinjitet
Kryeministri Edi Rama i ka bërë thirrje dje kryetarit të opozitës, Lulzim Basha, që të bashkëpunojnë për të mundësuar këtë vit çeljen e negociatave me Bashkimin Europian.
Rama, në fjalën e tij, ftesën e ka bërë vetëm për Partinë Demokratike, ndërkohë që për ish- aleatët e LSI- së ka thënë se janë pozicionuar qartë në kampin e të tremburve nga reforma në sistemin e drejtësisë. "Nga njëra anë, kampi i reformistëve, i Partisë Socialiste dhe i të gjithë atyre, që e duan këtë Reformë të shkojë deri në fund, sepse është e vetmja mundësi për të pasur më në fund një drejtësi të drejtë dhe kampi i të tremburve nga Reforma, i cili tanimë është zgjeruar edhe me përfshirjen haptas kundër Reformës në Drejtësi të aleatëve tanë të mandatit të parë", ka thënë Rama. Ai ka deklaruar se gjatë bashkëqeverisjes me LSI- në, PS rrezikoi qeverisjen vetëm për të mundësuar miratimin e Reformës në Drejtësi.
NEGOCIATAT
Por tanimë, sipas Kryeministrit, çelja e negociatave po rrezikohet nga politika e brendshme destruktive. "Çelja e negociatave me Bashkimin Europian po kërcënohet nga brenda Shqipërisë, po kërcënohet pikërisht nga frika prej Reformës në Drejtësi, e kthyer në një politikë të dëshpëruar destruktive, që ne si qeveri nuk ka çfarë na bën, por që Shqipërisë mund t'i sjellë një dëm të jashtëzakonshëm", ka thënë ai. Kryeministri e ka quajtur vitin 2018 si stacionin optimal për çeljen e negociatave, pasi vitin tjetër, BE do të rizgjedhë të gjithë strukturat e saj drejtuese dhe çështja e Shqipërisë nuk do të jetë më në axhendë. "Pse ky stacion është optimal? Sepse vitin e ardhshëm ka zgjedhje europiane për të gjithë hierarkinë e Brukselit. Vitin e ardhshëm nuk ka më kohë dhe vëmendje njeri të merret me ne, në rast se ne, me duart tona i hapim vetes një gropë mu në pragun e derës ku çelen negociatat për anëtarësim", ka thënë Kryeministri.
THIRRJA
Për këtë arsye, Rama i ka bërë thirrje Lulzim Bashës që të bashkëpunojnë për hapjen e negociatave. Kryeministri është zotuar se nuk do ta përdorë atë për të fituar kredo politike, por për t'i dhënë Shqipërisë shansin real të anëtarësimit.
"Unë dua sot t'i bëj një thirrje Partisë Demokratike dhe kryetarit të Partisë Demokratike: Nuk jemi këtu për të përdorur negociatat, që opozita të mos bëjë punët e veta dhe opozita të mos bëjë protesta. Opozita është e lirë të bëjë punët e veta, siç i mendon vetë dhe të imagjinojë të gjitha protestat e mundshme dhe të imagjinueshme. Por, nga ana tjetër, opozita, ajo që është në Parlament, është përfaqësuese e një pjese të popullit, që është në jetën e përditshme të Shqipërisë reale, në të njëjtin pozicion me pjesën tjetër të popullit. Opozita duhet të përfaqësojë me dinjitet, në këtë moment, ambicien e atyre që e kanë votuar për të çelur negociatat për anëtarësim", ka thënë Rama. Sipas tij, fishekzjarrët dhe çizmet janë të paimagjinueshme në këtë proces. "Është e paimagjinueshme që arsyen për të na penguar, ata që duhet të marrin vendimin ta gjejnë brenda Shqipërisë dhe ta gjejnë tek qëndrimi krejtësisht i papranueshëm i opozitës dhe tek ato shfaqjet e paimagjinueshme për botën normale demokratike europiane, me fishekzjarrë stadiumi dhe me çizme që përdoren si sende të forta në luftën politike. Unë jam absolutisht i gatshëm të nënvizoj se për ne, çelja e negociatave sigurisht është një sadisfaksion i jashtëzakonshëm, por nuk është një triumf partiak. Siç nuk e kthyem në një triumf partiak marrjen e statusit kandidat, pas aq shumë vitesh refuzime, nuk kemi ndërmend të kthejmë në një triumf partiak çeljen e negociatave.", ka thënë ai.