Po luante pranë ujit, fëmija 3 vjeç mbytet në lumin Kir

SHKODER – Një ngjarje e rëndë ka ndodhur në fshatin Bardhaj të Shkodrës, ku një fëmijë 3 vjeç është mbytur në lumin Kir rreth orës 13: 00 të së shtunës. Gjithçka ka ndodhur në një moment pakujdesie nga prindërit dhe familjarët e vogëlushit. Duke luajtur, i vogli ka humbur nga vëmendja e tyre dhe është larguar në distancë duke iu afruar rrjedhës së lumit. Ndërsa familjarët po merreshin me punë, 3- vjeçari është përfshirë nga rrjedha e ujit. Pavarësisht ndërhyrjes së shpejtë të të afërmve dhe prindërve të tij, vogëlushi është nxjerrë në gjendje të pavetëdijshme nga lumi. Në bazë të informacioneve që jep Policia e Shkodrës, fillimisht, kanë qenë kalimtarë të rastit që kanë vërejtur 3- vjeçarin në momentin që është rrëmbyer nga rrjedha e lumit. Ata kanë dhënë alarmin duke bërë që familjarët më pas t’i shkojnë në ndihmë. Pavarësisht dërgimit me urgjencë në Spitalin Rajonal të Shkodrës, mjekët nuk kanë pasur asnjë mundësi për ta rikthyer në jetë vogëlushin. Për shkak të sasisë së madhe të ujit, 3- vjeçari, bëjnë të ditur mjekët, është mbytur në pak minuta. Grupi hetimor i ngritur për zbardhjen e plotë të ngjarjes dhe rrethanave të saj, ka marrë në pyetje prindërit e fëmijës së mbytur si dhe kalimtarët në cilësinë e dëshmitarëve. Nga hetimet paraprake dyshohet se gjithçka ka ardhur nga një moment pakujdesie, duke bërë që i vogli të tërhiqet nga uji. Gjithsesi, do të jenë hetimet e mëtejshme që do të përcaktojnë shkakun dhe rrethanat që sollën ngjarjen e rëndë që i mori jetën fëmijës vetëm 3 vjeç.